Роль цуксса захIматсса дурив, муксса ххарину ва чIувну мунихух лагайсса бивкIун бур ва муксса куртIну давривун буххайсса бивкIун бурхха, му ппурттуву ваничIан гъан хьунгума къабучIину бивкIун бур. Мукун, куннил хъирив кув Лакрал театрданул сахIналийн буклан бивкIун бур Шагьун Ибрагьимовал хъинну хъирив лавну, цила тIабиаьтраявасса гьунарданийну ва куртIсса аькьлулийну утта буккан бувсса личIи-личIисса чIуннардил ва никирттал хъами.
РСФСР-данул лайкь хьусса артистка, ЗахIматрал ЯтIул Ттугълил ордендалул кавалер Шагьун Ибрагьимовал дуккаврил шачIануну хьуссар цила оьрму – тIайлабацIурттащал ва къуркъабацIурттащал, алши-талихIращал ва хIасратращал.
Ва бия театрданул я дянивсса, я ларайсса кIулшиву къаларснугу Дагъусттаннал театрал магьирлугърал хьхьичIунсса усттартурал плеядалувасса ца. Художествалул образрал гужирайну ва аьщуйн щаврийну укунмасса тамашачиталгу, сахIналул магьирлугърал минахуртал-критикталгу махIаттал-хIайран бан бюхъайсса.
Жяъпардул душ Шагьун Ибрагьимовал Лакрал театрданул бухкIулу лавхъун бур 1947 шинал, чIавасса душну бакъача, биял хьусса душну, дяъвилул захIматрал ва хIасратрал сасан бувсса, цила дакIнин ччимунил ва къаччимунил дазу рищун бюхъайсса оьрмулуву.
Гьай-гьай, цийн найбуна вихшала бувну къабивкIссар тамашачинайн лажин лажиндарайн сахIналийн буккан.
Хар-хавар бакъасса иширал кумаг бувссар, Лакрал театр гастроллайсса чIумал къашавай хьусса артисткан кIанай роль дугьан сахIналийн буккан багьну бивкIссар билетру бахлахисса душнин. Цинма цуппавагу дакIний бакъа, макIра кунна дургьуну дур Шагьуннул му роль. Ччаннугу зурзу тIий, цилва чIугу чилмур кунма баллай, хIатта сахIналийсса цила уртакьтуралми чIурдугума чарив архну, ттуруллава кунма баллай бивкIссар. Амма му ццах бакъа лавсъсса шаттирал тIивтIуссар ванин миллатрал театрданул мусил фондравун дурхсса бунияласса ва яргсса сипатирттачIансса, хъуннасса магьирлугърал дунийллийнсса ххуллу.
ЧIун наниссаксса ванил оьрму театрданулмунивух муксса хIала бувхссархха, махIаттал хъанай, бувчIин къахъанай бивкIссар муниннин рольлу дакъа, тамашачитал бакъа, сахIналийн букканнинсса къюкIлил ват-ват ва, бувккун, спектакльлая махъсса ххаришиву дакъа цуппа цукун оьрму бутлай биявав тIий. Гьарцагу рольданул ялувсса даву мунин диркIссар образрал щала тарих ва хьхьичI тарих лахьхьаврил рухI дусса процессну, театрданувунгу байрандалийн кунма бачайсса бивкIссар.
Роль цуксса захIматсса дурив, муксса ххарину ва чIувну мунихух лагайсса бивкIун бур ва муксса куртIну давривун буххайсса бивкIун бурхха, му ппурттуву ваничIан гъан хьунгума къабучIину бикIайва тIий дакIнин бутлан бикIай ванищал зий бивкIми.
Мукун, куннил хъирив кув Лакрал театрданул сахIналийн буклай байбивхьуну бур Шагьун Ибрагьимовал хъинну хъирив лавну, цила тIабиаьтраявасса гьунарданийну ва куртIсса аькьлулийну уттабуккан бувсса личIи-личIисса чIуннардил ва никирттал хъами. Ми сипатирттал ялун цичIар я ххи дуван, я миннуя чан дуван къадиркIун дур.
Ванил героиняхъул – итталун багьансса, гужсса, кьуват бусса хъами бур. Миннувасса цанния, М. Аьлиевлул «Буттал шяраву» тIисса Москавлив хьусса Дагъусттаннал литературалул ва магьирлугърал декадалул спектакльданувасса колхозрал преседатель Сакинатлуя ванияр чIярусса шиннардил хьхьичI бур учинсса театрал кказитирттай ва журналлай хъинну чIявусса хъин-хъинсса, ххуй-ххуйсса махъру чивчуну бивкIссар.
«Скромная, немногословная горская женщина таит в себе большую силу, нераскрытые возможности, душевную чуткость. Ш. Ибрагимова и показывает этот разворот сил, способностей, красоту характера… Это хорошая актерская работа», – тIий чичлай ивкIун ур «Театр» тIисса журналданий театрал критик Ю. Рыбаков.
Лакрал театрданул га никирал муданмасса тамашачитал куннахь кув байкъалитIавай буслай бивкIссар цуксса дакI дацIансса, вих хьунсса бивкIссарив Шагьун личIи-личIисса сипатирттаву: Севиль (Д. Джабарлыл «Севиль»), Тизбэ (В. Гюгол «Анджело»), Сакинат (М. Аьлиевлул «Буттал шяраву»), Тамари (ХI. ЦIадассал «Сапожник»), Ольга (Н. Думбадзел «Я, бабушка, Илико и Илларион»), Кади (Р. Хубецовал «Материнская слава»), Танкабике (М. Каримлул «В ночь лунного затмения»), СалихIат (М. Аьлиевлул «ПартIу-ПатIима»), Жумайсат (Г. Рустамовлул «Если сердце захочет») ва чIярусса цаймигу.
ЧIярусса шиннардил мутталий Шагьун Жяъпаровнал сахIналий щаллу дурсса ниттихъал сипатрурив дур кунниха кув къалархьхьусса, ссалчIав чIарав дирхьуну, цамур затраха лащан дуван къабюхъайсса. Мяйжаннугу, цуксса кунниха кув къалавхьхьусса бур кIивагу хъамитайпа-нину К. Мазаевлул «Мусил чIимучIали» ва Б. Рамазановлул «Гьарун Саэдов» спектакльлавасса.
К. Мазаевлулмур спектакльдануву ва бур куклу-кутIасса арснал нину Бахттуншал роль дургьуну. Цила арсначIа диркIсса щарссанил къатлуву ва бур ичIаллил гъилишиврухсса мякьлил къумашиву пишлил махъ ларитан хIарачат буллай. Кулпатрал къача-къучшивурттая анаварну лирхъсса арснал щарнил ва мунил цIуну хьусса ласнал хьхьичIа най бур ва цила шаппай, цачIавату ливхъсса талихI махъунмай зана битансса кьастгу къатIайлабацIусса хьуну.
Б. Рамазановлулмур спектакльдануву ва бур цIа дурксса революционер Гьарун Саэдовлул ниттил роль дургьуну. Ванил ниттихъал къумашиву дур вев-гьарай къатIисса, ххаришивурив – лакъачIлачIисса, ссикъадуцIлацIисса. Ванин кIула цила роль дургьусса хъами лавай буван, бюхттул буван, миннаву агьамшиву, хасият, дугъришиву дишин.
Шагьун Ибрагьимовал сахIналийсса къуццулул, бущилул циннара хасъсса лишанну дур жанрданул кIюласса асар, аьркинсса тонну, рангру язи дугьан бюхъаву, ттяйшиву, пIяй-ххай бакъашиву. Шагьун Ибрагьимова мяшри мимикалул, жестырдал чулуха, амма актрисал сахIналий дуллалисса цимурца хъанай дур мунил роль дургьусса хъаннил дакIурдил, миннал рухIирдал тагьарданул дагьанину.
Аькьилсса, махъ чIяву бакъасса Шагьун бикIайва судиягу, адвокатгу, дусгу, насихIатчигу, хъиншиврул ва гъилишиврул жазиралул заллугу. ВаничIан кIункIу тIий бур къужригу, мюрщи оьрчIругу.
Укунмасса оьрмулувугу Шагьун бия кьянкьасса хасиятрал инсан. Цийнува цуппа хIукмурду кьамул буллай аьдат хьусса Шагьуннуща бюхъайва, мукъуйну бакъассагу, анжагъ ца я битаврийнугу инсаннай бигар бишин, гьужум буван. Театрдануву ванияту мадара ккаккайссия тIар танмалтуран, даврийн букIлай-къабукIлай, цалла даву дакIнийхтуну къадуллалиминнан.
Гулизар Султановал
чивчумунива хIадур бувссар
Зулайхат Тахакьаевал
