«Дагестан» МЦК-лий хьунни Медициналул зузалал кьинилун хас дурсса шадлугърал мероприятие. Ванил сакиншинначитал хьунни Аьрасатнал президентначIасса Дагъусттаннал вакилхана, «Дагестан» Москавуллал культуралул центр ва ЦентрданучIасса медициналул зузалтрал ассоциация.

Ва кьини шикку лахъа-хъун буллай бия халкьуннал цIуллу-сагъшиврул къаралданий бавцIуми: ЦIуллу-сагъшиву дуруччаврил министерствалул зузалтрая, хIакинтурая байбивхьуну, санитартурайн, лаборантътурайн, статистътурайн, медициналул вузирдал студентътурайн бияннин. Медициналул зузалт барча буллалисса ва миннахь барчаллагь тIисса ихтилат бунни «Дагестан» МЦК-лул президент, техникалул элмурдал доктор, академик Арсен ХIусайновлул.

— Медициналул зузалал пиша бур яла аьркинмур ва яла бусравмур. Жун мудангу зуйн буккан багьай, зул кумаг аьркин шай. Жу дакIнийхтуну ххари шару зул гьарнал ккаккиярттая ва хьхьичIуннайшивурттая.
УрцIалку шиннардий, Москавуллал культуралул центр «Дагестан» сакин хьуну хъунма хIал къалавгун, жу сакин дурссия ЦентрданучIа Медициналул зузалтрал ассоциация (1990 шин). Мунияр шихуннай Медициналул зузалал кьини кIицI лагаву жучIа аьдатравун дагьну дуссар. Цалчин ва Ассоциациялул каялувчину уссия жула цIанихсса хIакин-травматолог МахIаммад Аьбдулхабиров, муная махъ, Ассоциациялий каялувшиву дуллай бур психологиялул элмурдал кандидат Гулизар Башанаева. Москавлив Дагъусттанная­сса хIакинтал чIявусса бур, чан­сса бакъар медициналул вузирдаву дуклакисса студентъталгу. Москавуллал ва Москавуллал областьрайсса циняв азарханардай, поликлиникардай, Научно-исследовательский институтирттаву, вузирдаву зий ва дуклай бур Дагъусттаннаясса азарахъул хIакинтал, ординатортал, аспирантътал,студентътал ва чIивимур медициналул персонал. Мигу шиная шинайн чIяву хъанай бур. Медициналул зузалтрал ассоциациягу яла хъуннамур дур, – кIицI лавгунни Арсен Буйдалаевичлул.

Хъирив ихтилат бунни Гулизар Башанаевал. Ванил бувсунни цила каялувшиву дуллалисса Ассоциациялия, мунил къайгъурдая, кIицI лавгунни Москавлив ва Москавуллал облатьрай зузисса Дагъусттаннаясса хIакинтал лагма лаган бавну, куннал чIарав кув бацIаву мурадрай Ассоциация сакин дан Арсен Буйдалаевичлул каялувшиннаралусса «Дагестан» МЦК-лул цуксса захIмат бивхьуссарив ва му цуксса агьамшиву дусса даву хьуссарив.
— Ттун тIааьнну бур жува хIакьину жулва шаппалу кунмасса «Дагестан» МЦК-лий батIаву. Медициналул зузалал кьини — ва дур ляличIисса, так жула билаятрай кIицI лагайсса байран. Ва цIакь дурну дур 1976-ку шинал. Цалчин кIицI ларгун дур 1980-ку шинал. Ванил лагма лаган буллалиссар инсаннал цIуллу-сагъшиврул къаралданий бавцIусса цинявппагу медициналул зузалт. Ттун пахру багьай гьари­ца шинах пишалул ххуллий ларайсса ккаккияртту чIалачIи дурсса хIакинтуран-дагъусттанлувтуран наградартту дуллалиний. Ми чансса къабикIай, — кIицI лавгунни ванил ва барчаллагь баян бунни Дагъусттаннал ЦIуллу-сагъшиву дуруччаврил министерствалун гьарица шинах жула хIакинтуран дуллалисса наградарттахлу.

Ччя-ччяни цила даврил уртакьтуращал, «Дагестан» МЦК-лул ва Мариян Илиясовал цIанийсса «Дараччи» ихIсандалул фондрал члентуращал хасъсса аьралий операциялул гьурттучитуран-аьрай­миннан ва госпитальлайминнан буллалисса кумаграя бувсунни цила ихтилатраву Аьрасатнал Обороналул министерствалул Санэпиднадзорданул агьаммур центрданул зузала Ххадижат Цаххаевал.
Ва кьини пишалул ххуллий, дуккавриву хьхьичIунсса зузалтран ва студентътуран Арсен ХIусайновлул ва Гулизар Башанаевал буллунни Барчаллагьрал чагъарду, ХIурматрал грамотартту ва медальлу. Наградартту дия «Дагестан» МЦК-лул, Аьра­сатнал профсоюзрал Дагъустт­а­ннал отделениялул, Дагъустта­ннал ЦIуллу-сагъшиву дуруччаврил министерствалул, Москавуллал областьрал цIуллу-сагъшиву дуруччаврил профсоюзрал чулухасса.
ХIурматрал грамотартту дуллунни мяйя студентнан ва мяйя хIакиннан. КIия хIакиннан буллунни Барчаллагьрал чагъарду. Хасъсса аьралий операциялийминнан ва щавурду дирну госпитальлай хъин хъанахъиминнан буллалисса кумаграхлу мукьа инсаннан дуллунни медальлу.
Наградартту ларсъминн­а­вух лакгу бия. Аьрасатнал президентначIасса Дагъусттаннал вакилханалул чулухасса Барчаллагьрал чагъар буллу­нни лавайсса даражалул хIакин-невролог Тутубава Башанаеван.

Хасъсса аьралий операциялул ветерантуран буллалисса кумаграхлу Аьрасатнал ЦIуллу-сагъшиву дуруччаврил профсоюзрал организациялул Дагъусттаннал отделениялул чулуха медаль дуллунни Гулизар Башанаеван. Барчаллагьрал чагъар буллунни «Солист» тIисса стоматологиялул клиникалул хъунама хIакин Ризван Илдаровлун.
Барчагу буллай, барачат хьуннав тIий буру циняв наградартту.

Андриана Аьбдуллаева