Республикалул медициналул идарарттаву МахIачкъалаллал клиникалул азарханалул (Портрал азархана) хьхьичIунсса кIану бугьлай бур. Азарханалул хъунама хIакиннугу ур Ккуллал шяравасса Кьурбаннул ва ЦIуйшиял шяравасса Светланал арс АхIмад Аьлиев.
Ва азархана бувну бур ларгсса ттуршукулул 70-ку шиннардий. Ва тIитIлатIисса шадлугърайсса батIаву хьуну дур майрал 14-нний 1974-ку шинал. Цалчинсса къашайшалтгу кьамул бувну бур вара чIумал. Азархана бавриха зий бивкIун бур Каспийскаллал хьхьирил пароходство. Азарханалулмур щурущаву мудангу щаллу хъанай диркIун дур МахIачкъалаллал хьхьирил машлул портрал чIарав бацIаврийну. Шикку хъин буллайгу бивкIссар щинал транспортрал зузалт.
Цила ххюцIалунния лирчусса шиннардил тарихраву ва идаралий къачансса дахханашивуртту хьуну дур, статусрайнгу, цамунийнгу дагьайсса. ЛичIи-личIисса шиннардий азархана зий бивкIун бур цал Баку шагьрулул Каспийскаллал хьхьирил пароходствалул биялдарай, яла – Нижне-Волжскаллал щинал бассейндалул. 2002-ку шиная шинмай, тIурчан, ва хъанахъиссар Кьиблалул округрал медициналул центрданул филиал, ций чIярусса шиннардил лахъишиврий каялувшиву дуллалиссагу Аьрасатнал Федерациялул лайкь хьусса хIакин, медициналул элмурдал кандидат Криштопин Виталий Степанович. Ва азарханалул цIанасса цIагу дур укунсса: «Махачкалинская клиническая больница Федерального государственного бюджетного учреждения здравоохранения «Южный окружной медицинский центр» Федерального медико-биологического агентства России». Яни ва хъанахъиссар Аьрасатнал Федеральный медико-биологический агентствалул Дагъусттаннайсса буссавагу ца филиал.
2015-ку шиная шинай ва азарханалий каялувшиву дуллай ур медициналул элмурдал кандидат, Дагъусттан Республикалул цIуллу-сагъшиву дуруччаврил лайкь хьусса зузала, усттарсса сакиншинначи АхIмад Аьлиев. Ванайн бусрав-барчаллагьрайссагу цикссагу буссар.
Увну ур АхIмад ЦIуссалакрал райондалий ЦIуссачIурттащиял шяраву. 1990-ку шинал вайннал кулпат бивзун бур Ставрополлал крайрайн. Шикку дянивмур даражалул школагу къуртал бувну, АхIмад увххун ур Ставрополлал паччахIлугърал медициналул университетравун. Ва къуртал бувайхту, зун ивкIун ур Ставрополлал крайрал №1 психиатриялул азарханалий хIакин-психиатрну. 2009-ку шинал вайннал кулпат зана хьуну бур Дагъусттаннайн. АхIмад ивтун ур Республикалул психоневрологический диспансерданул отделениялул каялувчину.
Бувсса захIматрахлу ва лайкь хьуну ур личIи-личIисса наградарттан: 2018-ку шинал ванан дуллуну дур «Дагъусттаннал халкьуннал виричу» тIисса награда; 2019-ку шинал – «Отличник здравоохранения» тIисса лишан. 2023 шинал дуллуну дур «ДР-лул цIуллу-сагъшиву дуруччаврил лайкь хьусса зузала» тIисса цIа ва «Аьрасатнал бусравсса гражданин» тIисса жяматийсса орден.
Ванияр ца-кIира шинал хьхьичIрив АхIмадлул И.М. Сеченовлул цIанийсса Москавуллал паччахIлугърал цалчинсса медициналул университетраву дурурччуссар элмулул кандидатнал цIа. АхIмадлул кулпат Изаза Аьлиевагу хьхьичIунсса хIакинни.
АхIмад Кьурбановичлул каялувшиндарай ва азархана цукссагу хьхьичIунмай хьуссар, цIусса отделенияртту тIитIаврил, цIусса оборудование ласаврил чулуха бикIу, низамрал, марцIшиврул чулуха бикIу.
Цалла даву ххуйну кIулсса пишакар, усттарсса каялувчи ва сакиншинначи АхIмад Аьлиевлул каялувшиндаралу зий ур 256 инсан. Вайннаву лакгу чансса бакъар.
АзарханалуцIун зий бур ца сменалий 100-124 инсан кьамул уван шайсса, 114 тах бусса поликлиника: 29 тах – терапиялул, 27 – неврологиялул, 22 – гинекологиялул, 20 – физический ва реабилитациялул медициналул, 15 – хирургиялул. Бур мукунма личIи-личIисса кабинетру (рентген-кабинет тIий, физиотерапиялулсса тIий), лаборатория.
Вай махъсса ца-кIира шинал дянив азархана ларайсса технологияртту ишла дурну медициналул кумаг бавриву чIаланну хьхьичIунмай хьунни. Терапиялулмур отделениялуву ишла дуллан бивкIунни хъин баврил ттизаманнул схемарду. Мукунма вайми отделениярттугу зий бур заманалуха лавхьхьуну, ттизаманнул кьай-кьуйгу, кьяйдардугу ишла дуллай. Хирургиялул отделениялий тIиртIунни ревматологиялул ва ортопедиялул направление, вайннуцIун тIивтIунни цIусса операционный блокгу.
Азарханалул базалий бур Дагъусттаннал паччахIлугърал медициналул университетрал факультетский терапиялул кафедрагу.
Барча тIий АхIмад Кьурбановичлухь ва ванал коллективрахь Медициналул зузалал кьини, чIа тIий буру вания тихунмайгу тIайлабацIу, хьхьичIуннайшивуртту, ца яла бусравмунин ккаллисса пишалий зунсса гъира-гьавас.
Бадрижамал Аьлиева
