Щарав
Июньдалул 22-мур кьини билаятрал тарихравун дурххунни Аьпалул ва къювулул кьинину. Ванияр 85 шинал хьхьичI ва кьини байбивхьуссар тарихравун яла оьхIалмурну бувхсса Буттал кIанттул цIанийсса Хъунмасса дяъви.
Щардал шяраваллил библиотекалий хьунни, ванил хъунмур Ульяна Оьмаровал ва «Солнечный» тIисса гъинтнил лагерьданул вожатая Диана Оьмаровал хIадур дурну, лагерьданий бигьалаглагисса оьрчIащалсса «Ва тарих жунма хъамабитан къабучIиссар» тIисса ссят. ОьрчIахь бувсунни дяъвилул цалчинсса ссятурдийра, цалчинсса гьантрайра жулва инсантурал, хаснува Брестскаллал къала буручлай бивкIминнал, ккаккан дурсса чувшиврия, фронтран кумаг буллай, къинттуллух зий бивкIсса хъаннил, къужрал ва оьрчIал захIматрая.
Ахирданий, «Аьпалул чирахъ» тIисса акциялувух гьуртту хъанай, лавхъунни майлул чирахъру – вирттаврайнсса абадлийсса барчаллагьрал ва бусраврал лишан.
ШавкIрав
Къумашиврул ва аьпалул кьинилун хасъсса батIаву хьунни ШавкIравгу.
Буттал кIанттул цIанийсса Хъунмасса дяъвилул ветеран Халилов Кьадинал арс Нажвадиннул бунни та дяъвилул муттарду дакIнин бичлачисса ихтилат. Шяраваллил библиотекалул ва Аьрасатнал халкьуннал аслийсса культуралул центрданул зузалтрал дунни ватан ххирашивруцIун дархIусса ссят. ШколалучIа тIивтIусса лагерьданийн заназисса оьрчIал дурккунни назмурду, увкунни аьралий балайрду. ХIадур дурну дия аьралий литературалул луттирдал выставкагу.
Ахирданий, щалвагу Аьрасатнаву дуллалисса «Аьпалул чирахъ» тIисса акциялувух гьуртту хъанай, майлул чирахъру лавхъунни. ТIутIал шалкка бивхьунни дяъвилийн лавгминнал аьпалун дацIан дурсса гьайкалдануцI.
БатIаву къуртал хьунни минутIрайсса пахъ багьаврийну.
Бадрижамал Аьлиева
Ккурклив
Аьпалул ва къювулул кьини, июнь зурул 22-нний, Ккурккуллал шяравугу лавхъунни Буттал кIанттул цIанийсса Хъунмасса дяъвилий жанну дуллуми дакIнин бичлачисса аьпалул чирахъру.
Шяраваллил майданнив дяъвилий жанну дуллуминнан ва гьурттучитуран дацIан дурсса гьайкалдануцI учительтурал ва дуклаки оьрчIал бивхьунни лавхъсса хъамул чирахъру, баян бунни минутрайсса пахъ багьаву.
Вара кьинилун хасну школалийсса оьрчIансса дяхттасса лагерьданий хьунни ххаллилсса мероприятие. Школалул хIаят чIюлу дурну дия дяъвилул лахIзарду ккаккан буллалисса суратирттал ва плакатирттал. Дия дяъвилиясса луттирдал выставка.Бюхттулну баллай бия жула халкьуннан нукIува ххира хьусса дяъвилул балайрду.
Дуклаки оьрчIал бувсунни Буттал кIанттул цIанийсса Хъунмасса дяъвилул талатавурттая, совет халкьуннал, миннавух дагъусттанлувтуралгу, Ватан дуручлай ккаккан дурсса чувшиврия.ОьрчIал дурккунни назмурду, увкунни балайрду.
Ккурккуллал шярава Буттал кIанттул цIанийсса Хъунмасса дявилийн 128 инсан лавгссар. Ватан душманная дуручлай 57 ккуркличунал жан дуллуссар. Миннал цIарду Ккурккуллал жяматран абадлий дакIний дикIантIиссар.
Андриана Аьбдуллаева
