ЦIуссалакрал райондалийсса Чапаево шяравасса жагьилсса хIакин Аьлиоьмар АхIмадов ивтунни Дагъусттаннал цIуллу-сагъшиву дуруччаврил министрнал къуллугърай. Мунийннин ва уссия Дагъусттаннал Янил микрохирургиялул центрданул директорну.

Увну ур Аьлиоьмар АхIмадов 1986-ку шинал апрель зурул 24-нний ЦIуссалакрал райондалийсса Чапаево шяраву, Къичурлухатусса Камиллул ва ЧIурттащатусса СалихIатлул къушлий.

ЦIуссалакрал школагу лавайсса кьиматирттай къуртал бувну, увххун ур Дагъусттаннал медициналул академиялувун. Ординатура бувккуну бур С.Н.Федоровлул цIанийсса «Микрохирургия глаза» НМИЦ-рай (национальный медицинский исследовательский центр). Миккува ивтун ур региондалий офтальмология хьхьичIуннай даврил отделданул каялувчину. Ххюра шинава заочнайну увххун ур аспирантуралувун. Миву дуклакисса мукьрагу шинай янил хирургиялухун агьну ивкIун ур. Муния махъ, генеральный директорнал кумагчину зий, поликлиникардал даврицIун, медициналул хIаллихшиннардал экспортрацIун бавхIусса масъаларттал ялув авцIуну ивкIун ур. Дагъусттаннал Янил микрохирургиялул центрданул хъунама хIакиннал къуллугърайн конкурс баян бувсса чIумал, ванан пикри хьуну бур микку гьуртту хьун. Конкурсрай Аьлиоьмардул лавайсса балл лавсун бур. Утти ва ивтунни Дагъусттаннал цIуллу-сагъшиву дуруччаврил министрнан кIанай.

ДакIнийхтуну ххариссару ва лавайсса къуллугъ жула лаккучунайн тапшур баврия. Барчаллагьри укунсса арс тарбия увсса нитти-буттайнгу. Ванал нину-ппу ЦIуссалакрал райондалий ххуйну кIулсса инсанталли. Камил АхIмадов чIярусса шиннардий Чапаево школалул директорну уссия, нину СалихIат мува школалий учительну ва цаппара шиннардий директорну буссия. ЦIанасса чIумал ва МахIачкъалаллал 51-мур школалий зий бур.
Барачатну бацIаннав къуллугъ цанма Аьлиоьмардунгу, щала Дагъусттаннангу.

Андриана Аьбдуллаева