Вай гьантрай Дагъусттаннал муфтий АхIмад -хIажи Аьбдуллаев хьунаавкьунни Лакрал районнал вакилтуращал ва имамтуращал. Лакрал райондалул администрациялул бакIчи Зураб Куччаевлун тIайлабацIу чIа тIий, муфтийнал кIицI лавгунни чIярусса шиннардий райондалул бакIчину зий ивкIсса Юсуп МахIаммадовлул район экономикалул ва социал чулуха хьхьичIуннай хъит учин дувангу хъунмасса захIмат бивхьушиву, диндалул давурттал чIаравгу авцIушиву.
Ванал кIицI лавгунни исламрал кIулшивуртту дулаврих районнайгу уттиния тиннайгу ххуйсса къулагъас духьурча, кулпатирттан ва шяраваллил жяматрангу мюнпат бикIантIишиву. МаслихIат бунни ппухълуннал бувгьуну най бивкIсса ххуллу-ххуттайх бачин.
«Дагъусттаннал хъунисса аьлимтурал, Гъази-Гъумучиял Жамалуттиннул ва Сайпуллагь-кьади Башларовлул ххуллийх бачавриву барачат буссар», – увкунни муфтийнал Лаккуй ислам цIу лаглай душивугу кIицI лавгун.
ЦIуссалакрал райондалул администрациялул хъунаманал кумагчи МахIач Акаевлул бувсунни райондалий диндалул иширттахгу, рувхIанийсса культура хьхьичIуннай даврихгу дагьайкунсса къулагъас душиву. Бувсунни ва ххуллий дуллалисса давурттая. Муфтийнал бувсунни ЦIуссалакрал райондалущалсса дахIаву личIиссара душиву.
«На 10-нниха лирчусса шиннардий зий ивкIссара ЦIуссачIурттахь. Ттул оьрчIругу бувссар ва хъуни хьуссар тикку. ЦIуссачIурттащиял шяравалу ттун так карталий ккаккан бувсса кIану бакъар, ттул оьрмулул ххуллу-ххуттал бутIар, къатригу дурссар на тикку», – увкунни ванал.
Бувсунни муфтийнал агьалинал оьрму ххуй чулинмай баххана баву мурадрайсса ва хъиншиврул ххуллийсса давурттавух хIала буххан къисттану бикIайшиву мудангу республикалул Муфтиятгу.
Бусан ливчIунни вай гьантрай муфтийнал кьамул бувшиву лакрал цамургу делегация: диндалул иширттавух чялишну хIала буххайсса душру-хъами. Шиккугу хьунни оьрчIан оьрчIнияцIава тIайласса тарбия дулаврил хIакъиравусса, рувхIанийсса культура гьаз давриву ниттихъал хъунмасса бияла бушиву аьч буллалисса ва цаймигу мюнпатсса ихтилатру.
ПатIимат Рамазанова
