Ставропольлай «Аьпалул багъ» тIисса дунияллул халкьуннал дянивсса акциялул лагрулий, СВО-лул Аьрасатнал цалчинма Виричув НурмахIаммад ХIажимахIаммадовлул аьпалун мурхьгу бувгьунни, митингу дунни.
Ва даврил сиптачиталгу бур НурмахIаммад ХIажимахIаммадовлул цIанийсса Ставропольлал жагьилтурал организациялул вакилталгу, тийхсса Дагъусттаннал диаспоралул вакилталгу.
Мурхь цуппагу бувгьунни Ставропольлал крайрайсса Дагъусттаннал вакилханалул ва кIива хъунисса вузирдал: Медициналул университетрал ва Аграрный университетрал чIарав.
Митинграй махъру лавхъунни Аьрасатнал Халкьуннал ассамблеялул Ставропольлалмур отделениялул хъунама Александр Ильченкол, тиккусса дагъусттанлувтурал кюрттарал хъунама Арсен Кичихановлул ва цаймигу бусравсса хъамаллурал.
Ставропольлал крайрайсса Дагъусттаннал вакил Аьбдулла Оьмаровлул бувсунни Виричувнал буттащалсса, Энгельс ХIажимахIаммадовлущалсса, дусшиврия ва Виричув тарбия авриву ниттил Сапижат Мазаевал хъунмасса бияла бушиврия.
Студентътурал бувккунни патриот тема аьч дуллалисса шеърирду.
Махъру лавхъминнал кIицI лавгунни, укунсса давурттал тарихрал хIурмат буну ва кьиматрайсса ххазинарду хьхьичIунну тарбия дуллалишиву ялун нанисса ник.
ПатIимат Рамазанова
