Вай гьантрай «Дагестан» РИА-лул редакциялий ДР-лул жагьилтурал иширттал министр Камил Саэдовлул пресс-конференция хьунни.
Ва хас дурну дия жагьилтурал сиптардан грантру итадакьаврил, Дагъусттаннал жагьилтал Щалагу Аьрасатнал лагрулийсса форумирттал кампаниярттавух гьуртту шаврил ва Жагьилтурал кьини кIицI лагансса хIадуршиннарду даврил масъаларттан.
2026 шинал Щалагу Аьрасатнал жагьилтурал форумрал кампаниялул лагрулий бан тIий бур 28 форум, миннува 20 Аьрасатнал даражалийсса ва 8 – округирттайсса. Гьарица шинал форумирттай гьуртту хъанай бур 1300-нния ливчусса Дагъусттаннал жагьилтал.
Форумирттал лагрулий дуллай бур жагьилтурал иширттал Федерал агентствалул конкурсру. Шикку ххув хьуминнан ккаккан дурну дур проектру дузрайн дуккан дансса грантру. Камил Саэдовлул бусаврийн бувну, жагьилтал грантирттал конкурсирттавух хIала буххаву мурадрай ларгсса шинал 70 млн къурушрал итабавкьуну бур.
Хьунабакьаврий личIиссара къулагъасрайн лавсунни жагьилтуран хъуннасса агьамшиву дусса «Каспий» форум. Гьашинусса форумрал даву хьунтIиссар сентябрьданул 5 – 10-ннийнин Дарбант шагьрулий. 500 инсаннансса кIану бусса форумрай гьуртту хьунсса аьрзарду буллуну бур 3000-нийн бивсса инсантурал. ХIатта, форум округрал лагрулийсса бунугу, шиккун бучIан тIий бур 50-нния ливчусса регионнаясса инсантал.
Жагьилтурал министерствалул дачин дурсса цинярдагу давурттал агьамсса мурадну хъанахъиссар ялун нанисса ник Ватан ххирану, тарихрал кьимат буну тарбия даву, жагьилтал бяйкьу ххуллийн къабуккансса чаранну лякъаву, заралсса иширттая арх баву.
Му бакъассагу, щалагу билаятрайгу, жучIавагу хъуннасса къулагъасрайн лавсун буссар волонтершиврул масъалартту. Форумрай гьуртту хъанахъими хьунабакьинтIиссар Аьрасатнал яла хьхьичIунми экспертътуращал, ккаккантIиссар вайннащал цала проектирдал хIакъиравусса маслихIатру. Форумрал кIулшивуртту дулаврил повесткалувух хIала буссар «Молодежь и дети» тIисса жагьилтурал ишбажаранчишиву ва билаятирттал дянивсса дахIаву цIакь даврин хасъсса миллатрал проектрал мурадру.
– Форумрай гьурттушинна дурминнал ххишаласса кIулшивуртту ласаврицIун, цайми билаятирттал инсантуращал дахIаву дурну, проектру дузрайн дуккан даврин кумагрансса грантругу ларсун махъунмай бучIайссар. Шиная шинайн чIяву хъанай бур форумрай гьуртту хьун ччисса жагьилтал. Мунилгу исват буллай бур форум тIалавну бушиву, – увкунни Камил Саэдовлул.
Министрнал мукунма бувсунни, байбивхьушиву микрогрантру ласаврил конкурсрайнсса аьрзарду кьамул буллай. Шикку ххув хьуминнан дулун ккаккан дурну дур 5 азарунния 300 азаруннин дирсса къуруш. Социал-проектраха зузиминнан хъуннасса къулайшинна дусса форум хъанай бур. Шиккунсса аьрзарду кьамул буллалиссар июнь зурул 16-ннийн бияннин. Проектирдан кумаг хIисаврайсса методикалул маслихIатру буллалиссар министерствалул чулухагу.
– Форумрай гьарица шинал гьуртту хъанай ур 800 инсан. Гьурттушинна дан язи бувгьусса цинявнначIа форумрайн бучIансса каши дакъашиврийн бувну, цикссагу инсантал къабувкIун ливчIссагу хьунни. Му иш хIисавравун лавсун, гьурттучитурансса ххуллийхсса харжлугърал жаваблувшинна цайнна ларсунни жула республикалул. Форумрал волонтершиврул, творчествалул ва патриот тарбиялул сиптарду дачин дурсса жагьилтурая чIявучин баянтIиссар, вайнная лидертал хьунтIиссар, – увкунни Камил Саэдовлул.
Ванал чIурчIав дунни грантирдан итадаркьусса арцу тIайлану ишлагу дурну, хIакьсса отчетгу дан аьркиншиврий.
Камил Саэдовлул бувсунни, «Росмолодежь. Гранты» экспертътуращал хьусса хьунабакьаврий кIицI лавгсса масъала — проектру куртIну ахттар дуршиву.
Ведомствалул каялувчи жагьилтурайн оьвчаву дуллай ур форумирттал кампаниялул давривух чялишну гьурттушинна дара тIий.
Министрнал мукунма бувсунни волонтершиврул ссятру салкьи даврийну, ЕГЭ дуллалисса ппурттуву ххишаласса баллу ласавриву дучIи лякъайшивугу.
– ЧIирисса чIумуй 200 ссят волонтершиврул салкьи дансса мероприятияртту дан къахьунтIиссар. Мунияту аьркинссар DOBRO.RU сайтрай регистрациягу дурну, ччянияцIава байбивхьуну, волонтершиврул давривух хIала бухлан, – увкунни Камил Саэдовлул.
Ванал бусаврийн бувну, чIявуми волонтертуран МЧС-рай, Спортрал министерствалий ва цаймигу хъунисса идарарттай давуртту лякъайсса дур.
Бувсунни Жагьилтурал кьини кIицI лагавринсса хIадуршиннараягу. — Байрандалун хас дурсса мероприятияртту хьунтIиссар республикалул 52 муниципалитетрай. Агьамми шадлугъру дикIантIиссар МахIачкъалалив. Сулайман Стальскийл цIанийсса сквердануву лахъа-хъунсса даражалийсса хьунтIиссар жагьилтурал сиптардал фестиваль, концертрал программа, спортрал бяст-ччаллу, мастер-классру, бюхъу-гьунар бусса жагьилтал аьлтту буллалисса ва миннан ххуллу тIитIлатIисса проектирдал ярмарка, — увкунни министрнал.
Имара Саидова
