Аьрасатнал аьралуннаву ялу-ялун чIяву хъанай бур Украиннал аьрщарай нанисса хасъсса аьралий операциялий ккаккан дурсса чувшиврухлу наградартту лайкь дурсса вирттал. «За боевые отличия» медальданун лайкь хьунни хушрай хасъсса аьралий операциялий гьуртту хьун лавгсса ЦIуссалакрал райондалийсса ЦIуссачIурттащиял шяравасса Кьурбаннул арс Даци ­Оьмаров.
Ватандалул мурадру буруччаврил ххуллийсса хIукму кьамул бувну бур ванал 2023 шинал апрель зуруй. ЦIанасса ппурттуву Даци ур «Маныч» тIисса артиллериялул дивизиялуву «Дон» тIисса разведкалул ва штурмрал бригадалуву аьралий бурж бартбигьлай.
ХIакьину ва дивизиялуву къуллугъ буллай бур къизгъинну талатавуртту нанисса кIанттурдай гьуртту хьусса, жула билаятраясса опыт бусса, гьунар ххишаласса аьралийтал. «Дон» бригадалул артиллеристътурал жула аьралийтурайн гьужум бан хIадур бувсса ВСУ-рал боеприпасирттал кIива склад бухлаган бувну, байщун бувну бур хъунмасса хIаллай хIадур буллай бивкIсса душмантурал операция.
«Дон» батальондалул цалчинминнавасса къучагъсса ­аьралийчу ур Даци Оьмаров. Херсонский областьрай хьусса талавурттаву ляличIисса къучагъшиву ва аьралийчунал профессионализм ккаккан даврихлу, лайкь хьуну ур «Дон» бригадалул командованиялул чулухасса Барчаллагьрал чагъарданун. ЗахIмат-жапасса иширттаву профессионализм ккаккан даврихлу ва къуллугърал бурж лажин кIялану биттур баврихлу Даци цимилагу наградарттан лайкь хьуну ур.
Жула миллатрал къучагъсса арсру цIуллу баннав, дакIру ххарину зана хьуннав!

Имара Саидова