МахIачкъалалив «Россия – моя история» цIанилусса тарихийсса паркраву хьунни «Наследники Победы» тIисса республикалул интеллектуал тIуркIулул хIасиллу дуллалисса батIаву. Вай бяст-ччаллаву ххув хьуми барча бунни Дагъусттаннал бакIчинал буржру биттур буллалисса Федор Щукиннул.

«Наследники Победы» тIуркIу жучIава буллалиссар кIилчин. Ва хъанахъиссар Буттал кIанттул цIанийсса Хъунмасса дяъвилун хас бувсса, дунияллул ва билаятрал тарихраву агьамсса кIану бугьлагьисса иширацIун бавхIусса суаллу бусса тIуркIу. Гьашинумунивун бивчуссар Аьрасатнал халкьуннал цашиврул шинацIун бавхIуми суаллугу.
Гьашину вай бяст-ччаллаву гьуртту хьунни 4 азарунния ливчусса дуклаки оьрчIру ва колледжирттал студентътал. Финалданийн, тIурча, дурккунни 70 команда. Цалчинмур кIану бувгьунни Каспийскалиясса «Патриоты» тIисса командалул, кIилчинмур – РутIуллал райондалиясса «Лидеры» командалул, шамилчинмур кIану – Лаващиял райондалийсса Жанмагахи шяраваллил дянивмур даражалул школалул командалул.