Вай гьантрай хасъсса аьралий операциялий гьуртту хъанахъисса ЦIуссалакрал райондалийсса ЦIуссаккуллал шяравасса Аслан МахIаммадов лайкь хьунни Жуковлул медальданун.

Гвардиялул ефрейтор Аслан МахIаммадов 2022 шинал сентябрь зуруй контракт чирчуну, къуллугъ буллан лавгун ур «Уран» батальондалул связьрал (Р-166-0,5) радиостанциялул водитель-электрикну. Аьралий бурж бартбигьлагьиссаксса хIаллай, ванал ккаккан бунни цува низам дусса, вихшала дишин лайкьсса къучагъ ушиву.
2026 шинал февральданий Асланнуйн тапшур бувну бур хасъсса аьралий операциялул ишру нанисса кIанттурдай ппив хьусса кабельлал линияртту дакьин дансса связистътурал группа биян бан. Связистътал биян бан най унува, ца ппурттуву ванан хIисав хьуну дур автомобильданийн тIайла дурсса дрон. Асланнул шикку ляличIисса сисаву, кьянкьашиву ва ларайсса пишакаршиву ккаккан дурну дур. НигьачIаву дусса тагьар хIисавравун ларсун, автомобиль махъунмай кIура баен бувну, лекьа-пIякьу хьусса къатравун буххан бувну, дрондалуща ххассал бувну бур. Вайннайн тIайла дурсса дрон магъуйн дагьну, автомобиль ва экипаж ххассал хьуну бур. Ва ишираща ливчуну махъ, Асланнул цамур ххуллийх гьансса хIукму бувну, связистътурал группа ккаккан дурсса чIумуй аьркинсса кIанттайн биян бувну бур. Ванал цимилагу укунсса иширттава аьралийтал ххассал бувну бур.
ТIайлану хIукму бан ва му бартбигьин кIулсса аьралийчунал къучагъшиврун лавайсса кьимат бивщуну, цимилагу лайкь хьуну ур ПаччахIлугърал наградарттан. Талатавурттаву ккаккан дурсса чувшивурттахлу ванан дуллуну дур «Участнику специальной военной операции», «За боевые отличия» тIисса медальлу ва цаймигу наградартту.
Имара Саидова