Ларгсса нюжмардий МахIачкъалалив «Миркато» кинотеатрдануву ккаккан дунни ттигъанну хьусса апатIсса иширттайн бувну ларсъсса «Мамедкъала» тIисса документал фильм. Ванил автортал бур «Дагъусттан» РГВК-лий зузисса Мадина Зиркьуева ва Ульяна Мукаилова.
Ва фильмрал автортурал тIисса куццуй: «Мы думали, что снимем хронику катастрофы, но сняли портрет мужества». Мяйжаннугу, фильм ккаклакиминнал хьхьичIун хъунмасса экрандалий буклай бур цаннаяр ца кьянкьасса, хьумунил лахIан къабувсса, ца лахIзалий думуницIа хьурчангу, гихунмайгу зунсса, занансса гъира-шавкь къалершсса геройтал. Автортурал гьаз дуллай бур ца цамургу, жулва заманнай хъуннасса агьамшиву дусса тема – инсантурал куннал чIарав кув бацIан анавар буккаву, кумаграл ка тIитIаву, цаманай цIими бушиву. Жулла республикалул инсантал бакъассагу, Аьрасатнал регионнаясса, дунияллул личIи-личIисса кIанттурдаясса.
«Мамедкъала» фильмрал презентациялийн бувкIун бия гьалак дурксса щинал щатIахьхьун биривсса инсантуравасса цаппара, вайннавух – Ккуллал райондалийсса СунбатIуллал шяравасса, Мамедкъала поселокрай бувсса, хъунма хьусса ХIабибат Аьбдуллаевагу, ванил ссурахъу Марина Раджабовагу. Фильм ккарккун махъ буллалисса цалва ихтилатирттаву вайннал барчаллагь увкунни цалва чIарав бавцIусса инсантурахь, цаятурасса киносурат ласун бувкIсса, цаява бувсъсса журналистътурахь.
Фильмрал «закрытый показрай» хьуминнавух чIявуми журналистътал бия. Вайннавух «Дагестанская правда» кказитрал хъунмур редактор Бурлият Токболатовагу.
– На бура совет эпохалул инсан. Ва фильмрал на зана бувунна ларгсса ттуршукулул 70-ку шиннардивун, Дагъусттаннай аьрщи сукку хьуну, щалла Совет Союз чIарав дарцIусса чIумувун. Ва махъ хьусса бала-апатIсса иширттавугу жулва генардал код зун бивкIунни. Махъсса 90-ку шиннардий хъанай бия инсаншиврийн, инсаниятрайн къаршимур, жиндралмур, мунияту хIакьину ва балаллувун багьминнан кумагран бувкIминнай жува махIатталгу, хIайрангу хъанай буру, хIатта ва инсаннал, инсаншиврул кьарал дунугу. Ва фильм щалвагу билаятрал лагрулий ккаккан дуван аьркинссар, ва дуккан аьркинссар хъунмасса ареналийн, – увкунни ванил.
«Мамедкъала» фильмрал автортуравасса ца, жулва лаккудуш, Цалчинмур ЦIувкIуллал шяравасса Мадина Зиркьуевал телевидениялий зий 14-нния лирчусса шинну хъанай дур. ЦIанасса чIумал ва бур «Дагъусттан» РГВК-лул «Дежурная часть» программалул ва «Страна гор» радиолул ведущаяну, мукунма ТГ-каналданул админну. Фильм ккарккун махъ ттул ванищал хъун бакъасса ихтилат хьунни.
– Ва ттул цалчинсса документал фильмри. На ва ласав Ульяна Мукаиловащал.Фильмрал оператортал – ХIасан Маммаев, Махарбек Оьмариев, монтаж ва чIу – Мирза Ширванов. Фильм ласлай, жу шамийлва лавгру Мамедкъалалив, съемкарду дуллай бивкIру Заречная ва Канделаки кIичIирттаву. Вай шаннагу кьини хъинну захIматсса хьунни, шаттирал бакIрахсса макь, къюву, лекьа-пIякьу хьусса къатри, лирну ларгсса хIаятру, багъру, бакIракъутталий кIура бавсса машинартту… Съемкарду дуллалиссаксса хIаллай яхI буллайгу бивкIун, МахIачкъалалив бувкIун, жура камерардайн ларсмур ккаклакисса чIумал диялсса макь рутIав. Жун захIматну бия хьумуних буруглан. Бала-апатIрахьхьун биривминнаннив цукссагу захIматри, амма, вай кьянкьану бавцIусса куц чIалай, жугу кьянкьа дуллай бивкIру. Фильмрал финал-аьшрив – кумагран щалва Аьрасат бучIавур, цилгу жунма хьул-умуд ххи буллалисса, ахир хъинсса хьуншиврийнсса бакъача, инсан цала балаллущал цувалу личIлай акъашиврийнсса, – тIий бур Мадина.
Бадрижамал Аьлиева
