Ттигъанну МахIачкъалалив хьунни Аьрасатнал магьирлугърал ишккакку Гулизар Султановал аьпа абад буллалисса мероприятие.
Ванил цIа дирзунни Дагъусттаннал театрдал музейран.
Аьрасатнал театровед, театрал критик, литературовед ва таржумачи дакIнин бутан бувкIун бия театрал магьирлугърал хьхьичIунсса ишккаккулт, Аьрасатнал элмурдал Академиялул мазрал, литературалул ва магьирлугърал институтрал зузалт, Гулизар Султановал пикрилул гьалмахтал ва гъан-маччами.
Лакрал театрданул каялувчи Бадрижат МахIаммадхIажиевал кIицI лавгунни Гулизар АхIмадовнал оьрмулул 50 шинал захIматрал ххуллу ва бюхъу бавхIуну бивкIшиву Дагъусттаннал театрал магьирлугъ хьхьичIуннай шаврицIун.
«Республикалийгу, Ухссавнил Ккавкказнавугу, гьай-гьай, буссар театроведениялул пишакартал. Амма Гулизар Султанова бия бикIанмагу бусса ца пишакар, цила щала захIмат театрданун хас бувсса, миллатирттал театрду хьхьичIунмай шаврил тагьардания бакъасса, хIакьину жущала буминнал ва дунияллия батIул хьусса цумацагу актёрнал ва режиссёрнал даврин кьимат бищун бюхъайсса», – увкунни Бадрижат МахIаммадхIажиевал.
Дагъусттаннал миллатирттал пишакарсса театрал магьирлугъ ядаврил ва хьхьичIуннай даврил ххуллий Гулизар Султановал бивхьусса багьа бакъасса захIмат дакIнин бувтунни ДР-лул культуралул министрнал хъиривчу Мурад ХIажиевлул, Оьруснал драмалул театрданул каялувчи ва режиссер Скандарбек Тулпаровлул, Мазрал, литературалул ва магьирлугърал институтрал магьирлугърал тарихрал отделданул каялувчи Эльмира Аьбдуллаевал, Поэзиялул театрданул директор Елена Гьаруновал, ванил хъиривмур Ариза Батыровал, театровед Наталия Гъазиевал, ДР-лул Жяматийсса Палаталул хъунаманал хъиривчу Ссапарбаг Аьбдуллаевлул, Мариям Илиясовал цIанийсса «Дараччи» фондрал хъунмур Гульшан Хасаевал. Мероприятиялий хаснура къулагъас дурну дия элмийсса ахттаршиннардан ва таржумарттан, цивгу хIакьину студентътуран ва преподавательтуран тIалавсса.
Шиккура ккаккан дунни Хамис Шамиловал Гулизар Султановаясса документал фильм.
Кулпатрал цIания Гулизар Султанова дакIнин бутан бувкIминнахь барчаллагь увкунни ванил душнил, психологиялул элмурдал кандидат Светлана Амировал.
Зулайхат Тахакьаева
