Аьрасатнал Халкьуннал цашиврул шинан хасну МахIачкъалалив Дагъусттаннал ва Башкортосттаннал оьрчIал дусшиву цIакь дуллалисса мероприятие хьунни.

Башкортосттаннал ­Кушнаренковский райондалия бувкIсса хъамаллуращалсса хьунабакьаврий гьуртту хьунни ва аьрххилул сиптачи ва сакиншинначи ­Аьрасатнал ПаччахIлугърал депутат Ризван Кьурбановгу.

Хъамаллураву чIявуми оьрчIру бия СВО-лий гьуртту хьуминнал кулпатирттавасса ва цIуллу-сагъшиврул нукьсансса. Ризван Кьурбановлул кIицI лавгунни ­Аьрасатнал билаятрал аваданшиву аьмсса тарихрайну ва кьиматрайсса ххазинардайну дархIусса душиву ва чIявусса миллатру, мазру, культура ва аьдатру душивугу жула рувхIанийсса хъус-ххазинану хъанахъишиву. ОьрчIащал Башкортосттанная бувкIсса нитти-буттахъалгу, Дагъусттаннаями нитти-буттахъалгу депутатнахьхьун буллунни тамансса суаллу.
«ЦIуллушиврул нукьсансса оьрчIан нину-ппушиву дуллан къабигьассар, ттун вай кулпатирттах вичIи дишин ччай бия, цукунсса буруккинтту ва масъалартту буссарив кIул хьуншиврул, ссах къулагъас дуван буссарив ххал буваншиврул. Гьаз буварду жу ва хьунабакьаврий реабилитациялул масъалартту, оьрчIру гьарца медициналул ва аьркинсса техникалул дузал буваврил масъалартту. Нитти-буттал гьаз бунни социал кумаг гьарза-гьарта баврил мюхтажшинна душиврул суаллу. ТIайласса тIалавшиннар. Законну кьамул дуллалисса ппурттуву чара бакъа хIисавравун ласунтIиссар вайннал масъалартту, къашавайсса оьрчIал къайгъурдах дагьайкунсса къулагъас дикIангу аьркинссар», – увкунни Ризван Кьурбановлул. Вайва гьантрай Башкоркосттаннаясса хъамал экскурсиялий биянтIиссар Дарбантлив ва Гъунивгу. Вагу дусшиврул ламу цIакь буван­сса даву хьунтIиссар.