ЦIуссалакрал оьрчIал ва чIава жагьилтурал спортрал 1-мур школалул (ДЮСШ) залдануву хьунни хасъсса аьралий операциялий чувшиврий жан дуллусса Рамазан ХIасановлул аьпалунсса чIава жагьилтурал дянивсса дзюдорал райондалул турнир.
Ва хьунни чIава спортсментуран цала гуж, хIал ххал бигьаврицIун, яхIирал дарснугу. Рамазан абадлий дакIний икIантIиссар вайннан Ватандалул мурадру буручлай, жандалий хIайп къаувкусса къучагъну.
Турнирданийн спортсментал барча бан ва къучагъ дакIнин утан бувкIун бия чIявусса бусравсса хъамал: властьрал ва диндалул вакилтал. Бия къучагънал кулпат, оьрчIру, ссурвал, дустал. БувкIун бия мукунма Рамазаннущал къуллугъ буллай бивкIми, цачIу талай бивкIми.Турнир тIитIлай, гьурттучитал барча бунни республикалул бакIчинал советник, «Каспий» батальондалул командир РахIим Нурмухановлул.
Ихтилатру бунни Буйнакскаллал райондалул бакIчинан кIанайсса «Каспий» батальондалул комбат Табир Маликовлул.
– ХIакьину шиккун, ва бяст-ччалливу гьуртту хьун, хаварбакъулий агьсса цучIав акъассар. Зу, ялун нанисса Ватан дуруччултру. ДакIний битияра, цила икIайкунсса талатала муттаэнаяр ялтту увккун ларсъсса ххувшаврийнунияр, цала мукъуйн ва жяматрайн тIайлашиврийну чIалан икIайссар, – увкунни ванал. ЦIуссалакрал шяраваллил бакIчи Рамазан Сулаймановлул, КIулшивуртту дулаврил управлениялул методист Мисиду Шахмандаровал кIицI лавгунни Рамазаннул чувшиву, ватан ххирашиву ялун нанисса никиран эбратну хъанахъишиву.
Гьурттучитурал виричунал аьпалун минутрайсса пахъ багьаву дунни.
Яла байбивхьунни бяст-ччал. Дзюдо – ва бур ссавур ва кьянкьашиву тарбия дуллалисса спорт. Вай хасиятру ккаккан дурссар Рамазаннулгу Ватандалул мурадру буручлай.
ХIажимахIаммадлул арс Рамазан увну ур 1983-ку шинал январьданул 11-нний ЦIуссалакрал райондалийсса Чапаевкаллал шяраву.
2024-ку шинал контракт чирчуну, хасъсса аьралий операциялийн Ватандалул мурадру буруччин лавгун ур. Рамазан ивкIун ур саперну, битуну ва водительну къуллугъ буллай. Цалчинсса контрактрал чIун дурккун махъ, кIийла ялагу лавгун ур. Махъва-махъсса аьрххилий, контракт чирчуну кIира нюжмардува, 2025-ку шинал октябрь зуруй, жан дуллуну дур. Ва лайкь хьуну ур Къучагъшиврул ордендалун, «За Отвагу» медальданун, мукунна ванан дуллуну дур «Дагъусттаннал халкьуннал виричу» тIисса цIа.
Рамазаннул махъ ливчIунни кулпат, шанма оьрчI. Ва ия нитти-буттал ца акъа акъасса арс, шанма ссийл ца уссу.
Андриана Аьбдуллаева
