Рамазаннул арс Кьурбанов Шакир
Июль зурул 5-нний, захIматсса цIуцIаврища ххассал къавхьуну, оьрмулул 56 шинаву жуятува батIул хьунни ххаллилсса лаккучу, дакI-аьмал авадансса инсан, гьунар бусса шаэр, Ккацраннал шяраватусса Кьурбанов Шакир Рамазаннул арс.
Шакир дунияллия лагаврил кьурчIишивугу кIидачIлай, дакIнийхтунусса жижара булай буру ванал кулпатрахь Галинахь, оьрчIахь, уссихь Мамедлухь, ссурваврахь Банавшахь ва Марияннухь.
Цал гьав нурданул дуцIиннав, алжаннул къапурду тIивтIуну лякъиннав.
Ккацраннал
ва Гьамиящиял жямат
__________________________________
МАХIАММАЛУЛ АРС ЮСУПОВ МАХIАЧ
Жапасса азаруннища ххассал уван къабювхъуну, оьрмулул 84 шинаву, ахиратрал хьунни хъинну хъунмасса бутIа инсаншиврул, чумартшиврул, дакI гьарташиврул буллусса, захIматраву савсъсса, чIявучин мяйжаннугу бусравсса, дустал, гьалмахтал чIявусса, ххаллилсса зунтталчу, хIакьсса лаккучу ЦIуссаккулатусса Юсупов МахIач МахIаммалул арс.
МахIач увссар 1932 шинал Ккуллал шяраву, Бикулав-МахIаммалул ва ПатIиматлул кулпатраву.
«Ттул захIматрал оьрму байбивхьуссар колхозрал бюрчурдил хIухчушиврия», — чайссия аьпабивул. Мяйжаннугу, хъунмасса, захIмат ххирасса кулпатраву хъун хъанахъисса МахIачлун ччяни зун багьссар. Колхозрал фермалул бригадирсса буттачIа бюрчурдил хIухчушиву дуллан багьссар чIивину уна. 1944 шинал, Ккулату Чачаннавун бизан бувну махъ тIурча, аьравачишиврия айивхьуну трактористну, шоферну зузаврия, райондалий яла хъуннамур колхозрал хъунама инженернайн ияннин, дакI марцIну зий ивкIссар, цал профтехучилище, хъирив механический техникумгу зий уна къуртал бувну. Мукьра шинай хьхьичIунну къуллугъ бувссар МахIачлул гьавалул десантътурал аьралуннавугу.
Колхозрал хъунама инженерну зий уна, цимилгу зун багьссар колхозрал председательнахлугу. Амма, чув, ци дулларчагу, МахIачлуя агьали рязинува бикIайссия. ЧIявусса буссия МахIачлул дакI-маз тIайласса дустал шяраву ва райондалийгу.
Хъунмасса захIмат бивхьуссар МахIачлул ЦIуссаккуллал жяматрал маэшат, багьу-бизу къулай бавриву: шяравун цIуну щин, электричество дуцавриву ва цаймигу иширттаву, хаснува колхоз райондалий цалчинмурну, республикалийгу яла хьхьичIунминнувух хьун давриву.
МахIачлул дакI марцIну бувсса захIматран лайкьсса кьиматгу бивщуссар. Ванан дуллуссар ЗахIматрал ЯтIул Ттугълил орден, цимирагу медаль, ДАССР-данул Верховный Советрал чулухасса ХIурматрал грамота, чIярусса цаймигу грамотартту, личIи-личIисса лишанну ва бахшишру.
Ци банссар, лавгунни МахIач цалва инсаншиврул, кулпатрал хъунамашиврул, ппушиврул буржругу марцIну биттур бувну. ХIайп, щаллу къавхьуссар МахIачлул хьурдай тIийнмасса ца умуд- хиял – карав буцин къавхьуссар увагу усса арснал оьрчI!
ДакIнийхтуну кьурчIишиву кIидачIлай, жижара буллай буру ванал оьрмулул дус Розахь, арс ХIасаннухь, уссил ва ссурваврал оьрчIахь, ссурахъаврахь, махъсса гъан-маччаминнахь, дустурахь.
МахIачлул бунагьирттал аьпа баннав, рухI хъинний дишиннав!
МахIачлул дакIний-мазрай бивкIмур иширайну бартбигьиншиврул ванал махъминнахьхьун цIуллушиву дулуннав, оьрмурдай барачат бишиннав. Амин!
Гьарун ХIасанов
АхIмадлул душ Шихамирова Заза
Уттигъанну ахиратравун лавгунни Къяннал шяравасса Шихамирова Заза АхIмадлул душ.
Заза бувну бур 1926-ку шинал Къяннал шяраву ХIажимурадовхъал тухумраву. Къянив 7 класс къуртал бувайхту, ва дуклан бувххун бур га чIумал Гъумук бивкIсса медучилищалувун. Амма дуклай ряхва барз шайхту, дуккавугу кьадитан бувну, ва гьан бувну бур Ленинккантуллая арх дакъа дуклакисса къанаврттайн. Гикку ванил дурну дур дачIи шин. Махъунмай зана шайхту, зун бивкIун бур Къяннал колхозраву бригадирну, полеводну. 1950-ку шинал щар хьуну бур Шихамирхъал Аьвдуллагьлун. Аьвдуллагь цувагу зий ивкIун ур колхозрал учетчикну, счетаводну, конюхну. Вайннал дянив хьуну бур 8 оьрчI: 2 душ ва 6 арс. Колхозраву зузисса мутталий Зазан цимилгудуллуну дур грамотартту, бахшишру. Вания хьуну бур «ЗахIматрал ветеран», дуллуну дур цаймигу медаллу, миннущалла – «Медаль материнства».
Яраппий я Аллагь, вил рухI ххуйний хьуннав.
ДакIнийхтунусса жижара буллай буру Зазал арсурваврахь, душварахь, щалагу агьлу-авладрахь. Зазан къабуллумур зун булуннав. Гьаттал ялув нур дизаннав. Амин.
Къяннал жямат
Муртузааьлил арс Муртузааьлиев МахIаммад
Уттигъанну, оьрмулул 91 шинаву жуятува лавгунни хъуначу, ххаллилсса адамина, иман ххисса, хIалимсса хасиятрал заллу Муртузааьлиев МахIаммад.
Увну ур МахIаммад Бархъаллал шяраву февральданул 23-нний 1925 шинал хъудугьул кулпатраву. Шиккува арулла шинал школа къуртал бувну, захIматрал ххуллу байбивхьуну бур 1941 шинал, счетоводну Бархъаллал школалий зий. 1943 шинал къуртал бувну Гъумуксса педучилищагу, зун ивкIун ур Ахъушиял райондалийсса ХIапшима шяраву учительну. Гания мукьах даргиял ва лакрал районнай личIи-личIисса давурттай зий ивкIун ур, 1956-1960 шиннардий дуклай ивкIссар Высший партийный школалий Волгоградрай. Га къуртал бувну махъ зий ивкIун ур собкоррну «Красное знамя» кказитрай, пропагандистну Ахъушиял РК КПСС-рай, яла – «Колхозное знамя» кказитрал редакторну.
1962-1964 шиннардий зий ивкIссар ХIапшима шяравусса дянивмур даражалул школалул завучну. Махъ зий уссия инспекторну, инструкторну, организаторну Лаващиял райондалул колхозрал управлениялий. 1964 шиная шинай уссия экономист-плановикну Ахъушиял райондалий Орджоникидзел цIанийсса колхозрай.
Кулпат бувну бур ХIапшима шяравасса, Шагьрузат бувцуну, вайннал дянив хьуну бур 4 оьрчI.
МахIаммад ия кару мусилсса устаргу. МахIаммадлул хIарачатрайну Хъундяъвилул гьурттучитуран дурну дур 11 гьайкал Дагъусттаннал личIи-личIисса шяраваллаву, 10 кьуллагу тIивтIуну, багьайсса куццуйн бувцуну бур.
МахIаммадлул бивкIулул кьурчIишиву кIидачIлай, жижара буллай буру кулпатрахь, оьрчIахь, гъан-маччанахь цинявннахьвагу. Махънал оьрмурдай барачат бишиннав. Пирдавс-алжан нясив баннав.
Бархъаллал, ХIапшима шяраваллал жяматирттал цIания МахIаммадаьлиев МахIаммадаьли
Хъинну бювххунни
Уттигъанну аьпалувух ивхьусса ХIажимирзахъал Мусал бивкIулул жу къума-банд лаган бувунну. ХIайп, ххалилсса гьунчIукьатIиричу, хIакьсса зунтталчу, аьркиннан кумаграл ка тIитIин, чIарав ацIан хIадурсса чув-адамина хар-хавар бакъа аьпалувух ишаву.
Ставрополлал Аьрали академиялувун арс Илияс дуклан ухлай, цучIав кIулсса акъасса кIанттай, жун хъунмасса, лахъан Заннал мутта къабуллусса, ка-кумаггу бувну, ца ниттиуссу, буттауссу чIарав къаацIанну чIарав авцIуна Муса. Му ххаллилсса кумаг жун хъамакъабитанссар жува дунияллий буссаксса.
Мусал бивкIулул кьурчIишиву кIидачIлай, жижара буллай буру кулпат Султан-ПатIиматлухь, арснахь Мусихь, душнихь Заирахь, ссурахъу ЛатIипатлухь, Кьурван-ПатIиматлухь ва щалвагу агьлу-авладрахь.
Мусал рухI алжаннул ххари даннав, гьав нурданул дуцIиннав. Буттан къабуллусса оьрмулул бутIа арснан, душнин ххи бувну лякъиннав Заннал. Амин!
Мусал рухIираха дуаьлийсса, муная бивзминнан талихI чIа тIисса Сани, Сиянат, Илияс, Ширвани, Бажу, Даниял
Ниттиха
ХIажиева ПатIимал аьпалун
Жу шаппай нанийни, гюнгутIул чIуний,
Ххяххабуклай гьава ххюва чулийнмай,
ХьхьичIун дуккайссияв хъямала дагьлай.
Тти чув дура ина, аьзизсса бавай?
ЦIан-чани хъячиннин, жу шанай буна,
Дякъивух, гъаравух щинав лагайвав.
КIарттуву цIу дирхьун, дувайва дукра,
Жу буччиннин зумув хъис къаласайва.
Парх-парх бивкIсса ччатIул кIара бущайва,
Хьулухух нанинан парча булайва.
Ласнал бутта, бава лазилакьайва,
ХIурматрай лас даврийн тIайла уккайва.
Чумартсса чув кунна, чай буртти диркIун,
Лагайвав базаллув ахъулсса ласун,
Мигу жуйх дарчIуну, лагайвав хIунгу,
ТIуркIутIи буллай мухI ганз каруннаву.
Ина дакъассар чин дакI къадиянссар,
Бявкъусса ужагърайн буххан ччай бакъар.
Ина бувсса хIурмат дакIний личIанссар,
Буссаксса чурххаву туннурду бишлай.
Абадлий вин буржлувсса вил арсру,
ш. Вихьул
