Жулва билаятрал тарихраву, байраннацIун, пишакарсса кьинирдацIун, къачансса дур гьарца шинал кIицI лагайсса пашмансса кьинирдугу, датардугу, вайннувасса цагу – апрельданул 26-мур кьини. 1986-ку шинал Чернобыллал АЭС-рай пIякь учаву хьусса кьини. МахIачкъалалив С. Стальскийл паркраву хьунни ва бала-апатI хьуну 40 шин шаврицIун дархIусса дягъулул митинг.

Ваний гьуртту хьунни МахIачкъала шагьрулул депутатътурал мажлисрал председатель Хиби Аьлиев, шагьрулул бакIчинал хъиривмур Эмилия Раджабова, шагьрулул Культуралул управлениялул хъунама Фарид Абалаев, «Дети Чернобыля» союзрал председатель Зугьра ХIалимова ва чIявусса цаймигу. Митинграй гьуртту хъанахъиминнавугу яла бусравмину бия ларгсса ттуршукулул оьккими ва нигьачIими иширттал цану тарихравун бувхсса Чернобыллал катастрофалул биян бувсса зараллащал талай бивкIми цивппа.

Шагьрулул бакIчи Жамбулат Салавовлул цIания бавтIминнал хьхьичI махъ лахълай, Хиби ­Аьлиевлул увкунни:
– ХIурмат бусса дустал. Ванияр мукьцIалла шинал хьхьичI хьусса хъунмасса бала-апатIрал дурсса щаву мудангу личIантIиссар жулла дакIурдиву. Чернобыллал АЭС-рай хьусса балаллул ликвидатортуравух бивкIссар Дагъусттаннаясса 3 азаруннийн бивсса инсантал. Жу зулгу, зу дурсса чувшиврулгу, цалва оьрмурду инсаният ххассал даврил цIаний харж бувминнал аьпалулгу хьхьичI бакIру кьус дитлатиссару. Зу хъанахъиссару махъа нанисса никирттансса чувшиврул ва виричувшиврул эбратну. ЧIа тIий ура цинявннан някIсса ссав ва ­оьрмулул лахъисса шинну, – увкунни ванал.

ЛивтIуминнал аьпалун минутIрайсса пахъ багьавугу дурну, радиационный апатIру ва катастрофарду сававну ­оьрмулува лавгминнан дацIан дурсса мемориалдануцI тIутIив дирхьунни. Митинграя махъ тIивтIусса ссупралухгу хьунни тай ишру, оьрмулува лавгсса ветерантал дакIнин бичлачисса ихтилатру.
Митинграй ия Чернобыллал АЭС-рал пIякь учаврил биян бувсса зараллал ликвидатортуравух, билаят радиациялия буручлачиминнавух ивкIсса, Шахьуйннал шяравасса Къандаев Исмяил МахIаммадлул арсгу. Совет Союзрал личIи-личIисса кIанттурдаясса инсантуравух Исмяилгу га чIумал, ца зуруйсса Майкопрай «учебкалийгу» ивкIун, лавгссар Чернобыллайн. Цалва бакIрачIан бучIанмур, ва аьрххилия махъсса цалла цIуллу-сагъшиву, ­оьрму цумур чулухунмай кIура баентIиссарив къакIулну, вай лавгссар бачIва хьусса, «ливтIусса» шагьрурдайн, лагма-ялттусса гьарца зат, хIатта ласласисса ссихIгума, загьрусса кIанайн, чIалакъачIи «душманнащал» талан. Талангума цукун аьркинссарив, ци дуллан аьркинссарив бакIрайва щинкIуй кIулну къабивкIсса, ярагъну канихь так дозиметрду диркIсса. Исмяил Чернобыллайн гьаннингу армиялий къуллугъ буллай ивкIссар Совет Союзрал кIилчинмур испытательный полигонну хъанай бивкIсса Семипалатинскалий. Цалва хьхьичIмур къуллугъгу ядерный ярагъунницIун бавхIусса бухьувкун, ватандалийн кьини дурксса чIумал, лавгссар Исмяилгу, ва кунмасса цаймигу цалва кумаг аьркиннийн. Амма, жунма кIулсса куццуй, вайннахмур къулагъасрив Совет Союз лирну махъ хъинну чан хьунни. Я цIуцIавурттах, я цайми захIматшивурттах къабурувгун, ичIуваминнангу, махъсса цайминнангу эбратну кьянкьа дурну оьрму бутлай бур вай.

Бадрижамал Аьлиева