ЦIуссалакрал райондалул бакIчи МаматIи ХIамзатов хьунаавкьунни хасъсса аьралий операциялия кутIасса отпускрай увкIсса Пахруттин Жабраиловлущал.

Хьунабакьаврий гьуртту хьунни райондалул бакIчинал хъиривчутал Султан ХIамзаев ва Рустам Сулайманов.
Администрациялул вакилтурал аьралийчунахь цIувххунни ци кумаг аьркинссарив, ссах мюхтажну буссарив.
Хасъсса аьралий операциялийсса тагьардания, аьралийтурал къучагъшивурттая ва ххувшаву ласунсса умудрай бушиврия бувсунни Пахруттиннулгу.
Аьралийчунал кIицI лавгунни социал газификациялул программалул лагрулий цанма газ буцин кумаг аьркинну бушиву. Райондалул каялувчитурал ва масъала дузал бан бакIрайн лавсунни.
Билаятрай захIматсса тагьар хIасул хьусса ппурттуву, Пахруттин цува хIакьсса патриот ушиву ккаккан бан хушрай контракт чирчуну, хасъсса аьралий операциялий гьуртту хьун лавгун ур.
– Цимилгу исват хьунни Дагъусттаннал аьрщарай цикссагу къучагъсса, виртталсса арсру тарбия бувну бушиву. Жувагу буржлувссару жула аьралуннал чIарав бацIлан. Барчаллагь къучагъсса арсру тарбия бувсса нитти-буттан. Укунсса патриотътал буссаксса, умудгу вихшалагу цIакь хъанай дур ххувшаву жула чулий душиврий, – увкунни МаматIи ХIамзатовлул.

Имара Саидова