«Опора России» дастталугърал Дагъусттаннаймур кьюкьлул каялувчи, Халкьуннал Мажлисрал депутат Зульгимар Тагьибова бакIчисса делегациягу бивунни гуманитар кумагращал ­Мамедкъалалив. Вайннал кьюкьлуву бия Цалчинмур ЦIувкIратусса Забида Оьмаевагу.

«Жул цIигьурнал гъилисса ахттайнссагу дурна, нахIува-нахIусса пулав, 400 инсан дукралул дузал увссия. Суратирттай, видеорттай ккаккаву личIири, жула яруннин ­ккавкмур личIири.
Ца дакьикьалул мутталий гьарзатрацIа, къатрацIа, чIярусса шиннардийсса захIматрацIа хьусса инсантурал буруккинттугу, пашмансса яругу дакIурдивун кьувтIунува ливчIунни. На жула шяравасса инсантурачIангу бивра, Шяпинал душ Сакинат Аьлилова ва чIаравва къатта бусса ванил арс хъуслицIа, думуницIа, къатрацIа хьуну бия. Бакьин дан шайсса даражалий къатри бакъая. Вайнналгу, укун думуницIа хьуну ливчIминнал дакIру рахIат дансса хавардувагу цукун бусланссарив къакIулну бияв. Зараллу гьаксса хъунисса хьуну бия. КIулбакъа бала инсантурачIан шаппай бувкIсса чIумал апатIругу къавхьуну бикIайссарив. Мюрщисса оьрчIру нигьа бувсун бия, нигьа къабусансса ишгу бакъая. Гьарма шаймур буллай ия, бувмур АллагьначIа хъинну лякъиннав. Яла-яла, къатри, кIичIиртту гьагълицIа марцI буллалисса волонтертурал лухIи бувну бия Мамедкъала. Машгьурсса инсанталгу зий бия: блогертал, политиктал, артистътал. Кьини дурккувкун, ина ци пишалул, ци къуллугърал, ци даражалул ­инсан уссарив бакъарча агьамсса, ссан учIисса, цукунсса кумаг буван кунасса уссариври. Жун бакIрайн агьуна дунияллийх цIа ларгсса спортсмен Умар НурмахIаммадовгу цала командалущал субботникрай.
Жул хъунмур Зульгьимар Ибрагьимовнал тара кьини дурна чара бакъа аьркинмунил сияхI. Вайннувух дарурттугу бия. «Опора России» предпринимательтурал ва клиникардал кумаграцIух лявкъуну, ванил цилва биян бувссар дарурттугу», – укун бувсунни аьрххилия Забидал.
Забидангу, ванищалминнангу, жуннагу ккаркцири пашман­сса кьинирду махъра-махъсса хьуннав, вай хъама ритансса ххаришивуртту ччяни ялун дияннав!
Уттиния тийнмай гьарцагу кIулбакъа балалуща Аллагьу Тааьланал буврувччуну лякъиннав! Жунгу утти так ххуймуния чичлансса букканнав.