Мукьра нюжмар дур ЦIуминалийсса ЦIуссаккуллал шяраваллил администрациялул зузалт, райондалул администрациялул вакилтуращал бигьалагай кьинирду дакъа зий.
Итникьини, жу, «Илчи» кказитрал хъунама редактор Руслан Къардашов ва отделданул редактор Андриана Аьбдуллаева бувкIсса чIумалгу, шикку даву щириркIуну дия. Чагъардал къалардугу хьхьичI бивхьуну, ми ххилтIу буллай, зузалтрахь цIухху-бусу буллай ия райондалул бакIчинал хъиривчу Амир Султанов. Вай бия гъараллал зараллу биян бувсса инсантурал масъаларттаха зий. ХIакьинусса кьини ЦIуминалийсса ЦIуссаккуллал шяраву 900-нния ливчусса кулпатру (3500-ннийн бивсса инсантал) бур. ЦIанасса чIумалнин кумаг бувара тIисса 2800 аьрза бувкIун бур. Миннува 900 аьрза ххал бивгьуну бур. Вайксса аьрзардаву хIукуматрая кумаг ласун бюхъайсса хъинну чансса бур, цанчирча чIявуминначIа бакъар къатрал документру (зеленкарду). Мукунминнан хIукуматрал кумаг буллай бакъар. Агана зурул дянив миннаща документру бан хьурча, цIунил аьрза чичин бюхълай бур. Ца инсаннаща бюхълай бур кумаграл хIакъираву кIива-шанма аьрза чичин. ЕДВ (единовременные денежные выплаты) ласунсса, мукунма къатран ва хъуслин, цIуллу-сагъшиврун бивсса заралданухсса кумаг ласунсса.
– Прописка дакъасса бухьурча, шяраваллил администрациялул дулайссар справка ми инсантуран мяйжаннугу зарал бившиврул, миннал аьрзарду тIайласса бушиврул хIакъираву. КIанттул администрациялул, аьрза бувкIма цана къакIулсса ухьурча, участковый гьан айссар ххал бан. Мунал чагъар буллуну махъ жу сукку шару гихуннайсса даву дуллай. Укун ххал бивгьусса аьрзарду тIайла буккайссар УСЗН-далийн тайннал хIукму бан. Кумаг къабагьлагьисса чIумалгу, му исват бан, ми аьрзардал ялув зун багьай комиссиялун. Райондалул бакIчинал тапшур бувну, жу хьхьичIва-хьхьичI жунма мяйжаннугу зарал бившиву кIулсса къатравух бувккун, миннал масъала щаллу барду. Зарал бивсса 24 къатта бухьурча, миннува бувагу 3 къатта бур документру бусса. Так ми 3 къатлун кумаг буллай бур хIукуматрал, гамур сияхI тIайла дуклакиссар ихIсандалул фондирттал кумаг бан ЗахIматрал министерствалийн. Зараллу бивсса чIявусса буну, ца жуйнува кумаг бан къахьуншиву чIалай, баян бувссар федеральный ЧС. Ва сияхIравун ЦIуминалийсса ЦIуссаккуллал шяравалу дакъассагу, гийхмур райондалийсса шяраваллавусса зарал бивсса къатригу (мукунсса 3-4 къатта бур гьарица шяраву) дагьссар, – буслай ур Амир Султанов.
Аьрза булун бюхълай бур къатлун, хъуслин бачIи-кьачIи зарал бивминнаща (сайки циняв укунсса бур), къатта-къуш башттан зия хьуну, яхьунсса даражалия лавгсса бухьурча ( укунсса бакъар) ва цIуллу-сагъшиврун зарал бивсса бухьурча ( укунсса ца инсан ур). Къатта-къушлин, хъуслин бачIи-кьачIину зарал бивсса инсантуран бакIра-бакIрах 78 азарда къуруш дуллай бур кумагран.
Бивсса зарал ххал буллалисса комиссиялуву бур райондалул ва шяраваллил администрациярттал зузалт, ЖКХ-лул, архитектуралул отделлал вакилтал, депутатътал. Амир Султановлул бусласимунийн бувну, даву захIмат хъанай дур личIину зарал къабивсса инсантураягу аьрзарду бушиврийн бувну, ми аьрзардал ялувгу хъирив лаллай, зун багьлай буну.
Андриана Аьбдуллаева
