Апрельданул 20-нния 22-ннийнин Москавлив най дуссия «Малая Родина – Сила России» тIисса щалагу Аьрасатнал шамилчинмур муниципал форум. Ванил сакиншинначитал бур щалагу Аьрасатнал кIанттул цилакаялувшинна хьхьичIуннай даврил ассоциация. Форум буллалиссар паччахIлугърал бакIчи Владимир Путиннул сипталийну, Аьрасатнал президентнал администрациялулгу кабавкьуну.
Властьрал ва жяматрал диалограл площадкалул кIану бугьлай, ва хъуннасса лагрулул мероприятиялул цачIун буллай бур щала Аьрасатнал регионнал вакилтал.
Форумрай гьуртту хьунни муниципалитетрал каялувчи Зураб Куччаев бакIчисса Лакрал райондалул делегациягу. Миву бия Хъурхърал шяраваллил бакIчи Саддам ЛухIуев, ШавкIуллал шяраваллил бакIчи Закир Асабов, Уриннал шяраваллил бакIчи СалихI Гьарунов, Буршиял шяраваллил бакIчи Амсар МахIачев.
Форумрай гьуртту шаврийну лакрал делегациялун хъунмасса мюнпат хьун тIий бур хьхьичIунсса территориярттал бюхъурду ишла буллан, инвестицияртту кIанкIу дан. Агьамсса мурадну хъанай бур чIяву миллатру бусса Аьрасатнал аьмсса тарихрал ва магьирлугърал бутIану ккалли хъанахъисса мюрщи шагьрурдал ва шяраваллал ирс ва аьдатру ядаву.
Форумрал ккаккан буллай бур цумур-цагу чIиримур ватандалулгу агьамсса кIану бугьлай бушиву Аьрасатнал гуж цIакь бавриву, экономика гьаз давриву ва социал аралул саргъуншиндараву.
Гьуртту хьуминнал бусаврийн бувну, форумрал программа сакин хьуну дур кIанттул цилакаялувшиндарал органнал даврил лябукку лавай баврил, ишбажаранчишивруцIун кабакьу баврил, территорияртту хьхьичIуннай даврил, проектру зузи даврил суаллу ххал бигьлагьисса кьува секциялийх дарчIусса мероприятиярттая. Хаснура къулагъас дурну дур чIиримур бизнес ва шяраваллил хозяйство хьхьичIуннай даврих, муниципал хIаллихшиннарду цифралул журалийн дуцаврих, шагьрурдай къулайсса шартIру хIасул даврих, мюрщи шагьрурдал ва щархъал магьирлугърацIун кабакьу баврих.
Программалул ца агьамсса бутIану ккавккун бур кIанттул цилакаялувшиндарал законодательство лавайсса даражалийн дуцинсса ва инвестицияртту кIункIу даву чялиш дуккан дансса федерал властирдал сиптарду ххал дигьаву.
Форумрай гьуртту хьуну бур Аьрасатнал гьарца субъектирттаясса азаруннийн бивсса регионнал ва кIанттул администрациярттал вакилтал, экспертътал, аьлимтал, ишбажаранчитал ва жяматийсса ишккаккулт. Гьурттучитурал агьамсса ххуттай кIицI ларгунни укун хъуннасса лагрулул мероприятие, умуд бивхьунни форумрал даврил хIасиллу хъин чулий асар хьунссар тIий билаятрал кIанттул цилакаялувшиндарал система цIу дуккан даврин.
Зулайхат Тахакьаева
