Лакрал райондалул бакIчи Зураб Куччаевлул барчаллагь увкунни тIабиаьтIрал апатIрайну бивсса зараллу бухлаган буллай зий бивкIсса къуллугъирттахь ва кьини дуркний чIарав бавцIусса ватанлувтурахь.
«Лахъи ларгсса рирщу гъараллал, тачIав бакъачIинсса лагрулул марххалттал, хъунисса зараллу биян бунни райондалул инфраструктуралун. ЛахIунтту, кьунтту багьну зия хьунни ххуллурду, тталлу кьатI хьуну, ххаллу руцари хьуну, чани бакъа ливчIун бия агьали.
Ххуллурдал ва электросетирттал зузалтран кумагран бувккунни шяраваллал жямат, леххаврий бувкIунни шагьрурдаягу, тIайла дурккунни ххуллурду марцI буккан бувансса техника ва гуманитар кумаг.
Хаснува кIицI лаган ччай ура захIматсса шартIирдай, оьрмулунсса нигьачIаврих къабурувгун, хьхьу-кьини къакуну зий бивкIсса ххуллурдал зузалт ва электросетирттал пишакартал, вайннал чIарату ша хIура къабувсса, архсса щархъавусса агьалинал оьрмулун чара бакъа аьркинмур диян дуллай, занай бивкIсса полициялул зузалт, тагьар къулагъасралу дургьуну бивкIсса диспетчертал», – увкунни Зураб Куччаевлул.
ТачIав дакъачIин захIматсса гьавалул тагьар сававну, кьини дурксса ватанлувтуран гуманитар кумаг тIайла буклай бивкIсса ишбажаранчитурал сияхI лахъисса дур:
ДР-лул Виваллил иширттал министр Аьбдурашид МахIаммадов, Халкьуннал Мажлисрал депутат Марат Илиясов, Архмур Восток ва Арктика хьхьичIунмай баврил ялув зузисса ХIажимахIаммад ХIусайнов, Москавливсса Дагъусттаннал Культуралул центрданул каялувчи Арсен ХIусайнов, профессор Астемир Шайхаьлиев, ишбажаранчитал Шамил Аьлиев, Муслим КьатIаев, МахIаммад Мустапаев, Гьарун Ссунгъуров, АьбдулвахIид Жаватов, Аьлил Шуаьев, Анвар ХIажиев, Мурад Шахшаев, Малик Жабраилов, Аьбдулкарим Айгунов, ХIасан ХIасанхIажиев, Сулайман ХIусайнов, Илдар ЦIаххаев, Амир Илиясов, Мариян Илиясовал цIанийсса фонд «Дараччи», ихIсандалул фонд «Чистое сердце», Ттурциял шяраваллил жагьилтал ва чIявусса цаймигу. Лях лавгун ливчIсса ухьурча, ялтту бучIияра, увкунни Зураб Куччаевлул.
Кьуват булуннав зухьхьун дакIру сахаватлувсса, ка тIиртIусса лакрал чиваркI! Зул каши ххи даннав! Бувмур чирину бацIаннав! ТIутIайх бичиннав Лакку билаят!
Зулайхат Тахакьаева
