Лакрал райондалул бакIчи Зураб Куччаев ивунни Хъуннащиял шяравун ттукI буллалисса энергетиктуран кумаг бан. Электросетирдал зузалтрал бусаврийн бувну, ттукI буллуну бур Ххалаккиял, Гьуйннал, Кьукуннал, Аьхъардал, Вира­ттиял ва Инишиял шяраваллавун. Ххюлуссу­ннал, Буршиял ва НицIавкIуллал шяраваллаву ттигу зийнма бур. ЗахIматсса тагьардануву лирчIун дур Мукьархъиял махIлалийсса шяраваллу. ЛахIунтту дагьну, техника гьан-дучIан къахъанай, ттукIгу, связьгу, дунияллущалсса дахIавугу дакъа лирчIун дур.
АрвахIкьини кIихун гьан дунни ххуллурду марцI бан кIусса техника.

***
Райондалул жагьилтурал кумаграцIух бакьин ­бунни рирщу гъараллал лекьан ­бувсса Гъумучиял хIатталлил чIира.
***
ЧIурттащиял шяраву анавархъиндарай цIу бунни тIабиаьтрал апатIрайну кьатI хьусса ттукIрал тталлу. Энергетиктуран кумагран шяраваллил бакIчи МухIсин МахIаммадовлущал бувкIунни кIанттул агьали.

***
Электросетирттал зузалтрал дакьин дунни Лахъирдал ва Къуруллал шяраваллавунсса ттукIрал ххаллу ва телевышка.

***
Райондалий МВД-далул зузалтрал кумаграцIух баххана бунни ттукIрал тталлу. Участковыйтал дукия диян дуллай бур бугьарасса оьрмулул инсантуран.

***
Рирщу гъараллал лахIунтту зизин дурну, кьакьарду дагьну, зия хьуну бия КIундив нанисса ххуллу. Шяраваллил бакIчи МахIаммад МахIмудовлущал кIанттул агьалинал анаварсса мутталий марцI бувну щинаххуллурду, цин лархьхьусса тагьарданийн бувцунни. «Жун бувчIлай бур тIабиаьтрал апатIирттая махъ зузалтрал ка хъирив лаллай дакъашиву гьарца шяравунсса ххуллурду бакьин буллан. Мунияту шяраваллил жяматрал кабакьулийну бакьин барду ххуллурдал идаралул гьан дурсса техникалул кумаграцIух», – увкунни МахIмудовлул.

***
Райондалул ххуллурдал зузалтрал марцI бувну, бакьин бунни хъуннасса лахIуни дагьну, зия хьусса Кумиял шяравун биявай­сса кIанттурдайсса республикалул ххуллу.

***
Зураб Куччаевлул Гъумучиял шяраваллил администрациялийн тапшур дунни ччюрк ххияй­сса цIусса КАМАЗ-рал кIулли. Барчаллагь увкунни ва хъуннасса, чарабакъа аьркинсса бахшиш райондалун дурсса ишбажаранчи СалихI ХIажиевлухь.

***
Итникьини Гъумук итабавкьунни шяравух агьали занансса маршрутка. Ва пишкаш бувссар МахIачкъалаллал мэр Жанбулат Салавовлул.
Транспорт занантIий дур ХанМуртазялил гьайкалданучIату цIусса детсадрал къатрачIан дияннин: кIюрххил, ахттайн, ­ахттакьун.

Зулайхат Тахакьаева