Лакрал райондалул администрациялий ДР-лул Халкьуннал Мажлисрал депутат Марат Илиясовлул гьурттушиндарай хьунни электросетирдал каялувчинащалсса ва зузалтращалсса хьунабакьаву. Муний ххал бивгьунни ттукIрал дузалшиндарайн, электросетирдал даву лядуккан дансса чаранну лякъаврийн багьайсса агьамсса суаллу.
Марат Илиясовлул барчаллагь увкунни энергетиктурахь агьалинан чIумуй ттукI булаврил ххуллий жапасса шартIирдай буллалисса захIматрахлу. Райондалул бакIчинал хъиривчу Эльмира МахIаммадовал кIицI лавгунни район хьхьичIуннай шаврил ххуллий агьалинансса ттукIрал дузалшинна агьамсса кIанттай душиву. Умуд бивхьунни администрациялул ва электросетирдал зузалтрал цачIусса гужирдацIух агьали ттукIрал дузал бан бюхъан тIий бушиврийн.
КIицI лавгунни райондалул электросетирдай зий бушиву лавайсса даражалул пишакартал, тIабиаьтрал апатIирттаву захIматсса шартIирдай зий бухьурчагу, цила чIумал агьалинан ттукI булайшиву.
Дух хьусса техникалуцIух архсса щархъавун гьан-бучIан, зун хъанай бакъашиву хIисаврайн лавсун, райондалий дакI аьтIисса меценатътурал арцу дартIун, машан лавсун бур электросетирдал зузалтран цIусса машина.
Машиналул кIулли Марат Илиясовлул дуллунни Гъумучиял электросетирдал каялувчи Зураб ХIажиевлухьхьун. Муния махъ, Марат Илиясовлул энергетиктуран буллунни ДР-лул Халкьуннал Мажлисрал Промышленностьрал, ЖКХ-лул, транспортрал ва ххуллурдал хозяйствалул комитетрал чулухасса барчаллагьрал чагъарду.
Зураб ХIажиевлул барчаллагь увкунни Марат Илиясовлухь ва райондалул бакIчи Зураб Куччаевлухь энергетиктурал даву куклу даврил ххуллий бувсса кумаграхлу. Ванал кIицI лавгунни цIусса автомобиль агьамсса ярагъну хьун тIий бушиву энергетиктурал давриву. Ва хьунабакьаврий аьлтту хьунни райондалий энергетиктурал даврих агьамсса къулагъас дуллай бушиву.
Администрациялул, депутатътурал ва жяматрал гужру цачIун бувну бушиву агьали ттукIрал дузал бан.
