Гужсса гъаралуннил хъунисса зараллу биян бунни Дарбантуллал чулийнгу. Апрельданул цанний щинал бувцIусса Геджухское водохранилищалул дамба хъя куну, Мамедкъала щиналу личIан бунни.
Дайгьин къархьусса щиналгу укунсса чIумал баймур бунни: чIярусса шиннардийсса агьалинал захIматрацIух ца дакьикьалий цIу дирхьунни. Амма шиккугу кIицI лаганну дуниял хIайран дуршиву Дагъусттаннал халкьуннал зумату щяв къадирхьусса, «жува сагъну личIаврийн щукрур» тIисса дуаьлул калима.
ДакIнин бутанну, Мамедкъалалив душиву лухIитIутIул 20 тонна датIайсса цIанихсса совхоз Нариман Аьлиевлул цIанийсса.
ЯхI бунни ва ххуллухьгу агьалинал дурк кьини лахълайгу, духIлайгу. МЧС-рал баян бунни Мамедкъалалия ва лагма-ялттусса Юный Пахарь, Геджух шяраваллава 4000-нниха ливчусса инсантал бизан бувшиву.
Билаятрал МЧС-рал бакIчи Александр Куренковлул президент Путиннухь бувсунни ряха инсан ливтIусса хьушивугу. Ва балаллува инсантал буккан буван 1200 ххассалуву ва 200 техника зий душивугу кIицI лавгунни. ВайннацIун кумагран бувккунни чIявусса агьали, волонтертал. Бувккунни хIакинталгу, артистъталгу, блогерталгу. Гьаннайсса, леххаврил чIу баян буван ччимигу, иширайну чIарав бацIан анавар бувкмигу. Хьхьу-кьини зий бивкIунни инсантал нигьачIаву дакъанийн буккан буллай.
Культуралул къатлуву гуманитар кумаграл склад бувну бур. Инсантал дукиялул, лаххиялул, аьркинмунил дузал буллай бур. Ци тагьар дурив, букIлакIисса кумаг цукун бачIлай бурив ккаккан ивунни вайнначIан республикалул парламентрал хъунама Заур Аскандаровгу. Поселокрай ппив-ххив хьуну дур коммуникациярду. Муххал ххуллугу щиналу ливчIун бур.
ХIакьинусса кьинигу чIявусса агьали зий бур поселокрал кIичIиртту ва хIаятру гьагълицIа марцI дуллай, лирчIми щин дуккан дуллай. Федерал телеканаллал журналистътал бур Мамедкъалаливсса ххуллу гьалакIу бувсса найракъатIа кунма бур вай гьантрай тIий. ЧIаххуврайсса республикардаясса бакъагу, архсса регионнаясса, Донецкалиясса, Херсоннаясса волонтерталгу бур. ЧIатIри каруннища хIура къадуллай, дяхьхьунивугу зузисса чиваркI, ца зумату кунма, циняв «цал Мамедкъала марцI буванну, яла лахъанну шану буччиннин» тIий бур.
ПатIимат Рамазанова
