Ххуллункьини МахIачкъалалив, «Россия – моя история» тарихрал паркраву, хьунни «Каспийская звезда» цIанилусса хъаннил кIулшиву авадан даврил ххуллийсса цалчинсса конференция. Ва сакин дурну дия Мурманскаллал областьрал Цасса волонтёршиврул центрданул, Аьрасатнал ВМФ-рал Каспийскаллал флотилиялул командованиялул ва Дагъусттан Республикалул ХIукуматрал кабакьаврийну.
Конференциялул лагрулий аьралийтурал ва ватан дуруччултрал хъаннин хас бувну, Москавлиясса, Мурманскалиясса ва МахIачкъалалиясса экспертътурал бувккунни лекцияртту, ккаккан бунни мастер-классру.
Дагъусттан Республика хьуну дур ряххилчинсса регион «Звезда Севера» тIисса Мурманскаллал областьраясса щалагу Аьрасатнал проектрал конференция дуллалисса.
Ваний гьуртту хъанай бур Аьрасатнал мукьва флот: Беломорскаллал, Ухссавнил флотрал, аьралуннал ва хьхьирил база, Каспийскаллал флотилия.
Гьарца шинал щалагу Аьрасатнаву «Звезда Севера» проектрал флотирдал конференциярттай гьуртту шайсса бур мукьазарва хъамитайпа. Ваний цIусса кIулшивуртту ласаврищал вайннаща бюхълай бур цала сиптардугу чулийн дуккан даврил ялув зун. «Каспийская звезда» МахIачкъалалив итабакьаврийну лавсун бур Аьрасатнал ВМФ-рал буссар кусса флотру ва флотилияртту цачIунмай бувсса социал проект хьхьичIунмай бансса ша. Мунил агьамшиву хъунна хъанай дур проект Аьрасатнал Халкьуннал цашиврул шинал чулийн буклай бушиврийну.
Конференциялий гьуртту хьунни республикалул культуралул министр Зарема Буттаева. Ванил бувсунни Дагъусттаннал бакIчи Сергей Меликовлуясса ссалам.
«Ва конференция 2020 шиная шиннай жула билаятрайсса «Звезда Севера» тIисса хъуннасса социал проектрал цIусса этапри. Проектрал цачIун буллай бур регионну хьхьичIунмай баврил ххуллий чIалансса кIантту бугьлагьисса цимивагу азарва чумартлувсса хъамитайпа.
ДакIнийхтуну барчаллагьрай ура Цасса волонтершиврул центрданул каялувчи Евгения Владимировна Чибислуйн, проектрал щалла командалийн аьралийтурал кулпатирттан кабакьаврил ххуллийсса даврихлу, опыт кIибачIаврихлу ва Дагъусттаннай цIусса цIуку лахъаврихлу», – увкуну бур Сергей Меликовлул адресрай.
«Звезда Севера» проектрал мероприятияртту най дур Аьрасатнал Федерациялул СоветрачIасса «Женщины и их роль в развитии флотских городов» тIисса Евразиянал хъаннил форумрал лагрулий.
МахIачкъалалив конференция тIитIлай, видеосвязьрай Евразиянал Хъаннил форумрал советрал хъунмур Галина Кареловал увкунни: «МахIачкъала шагьрулул аьчухну кьамул дунни Евразиянал Хъаннил форумрал советрал проектрал команда. Мукьва флотрал вакилтал лагма лавгунни проектрал координатор Евгения Чибислул, хъаннинсса каширду тIитIиншиврул, цала шагьрурду хьхьичIунмай булланшиврул, СВО-лул гьурттучитуран ва вайннал кулпатирттан ка-кумаг булланшиврул. Зул оьрму зула ласвавращал бавхIуну буссар Каспийлий къуллугъ баврицIун», – увкунни Галина Кареловал.
«Нажагьсса хъамитайпалун бакъа нясив къашайссар аьралийчунал кулпат хьун. Хьхьу-кьини дакъа къуллугърайсса лас, даврийн уххаврил ялувсса буруккинтту, къуллугъ буллан цамур кIанттайн бизаву. Укунсса тагьардануву аьч шайссар оьрмулул гьалмахчунал дакI тIайлашиву, вихшаласса къинтта, чул бищунсса ттарцI ва аьралийчунал талихI. Каспийскаллал флотилиялул хъунаманал цIания барчаллагь тIий ура зухь, гьарцаннухь, зула кулпатирттал чIарав бушиврухлу. Мурманскалиясса хъамаллурахьгу барчаллагь тIий ура флотру бусса шагьрурдай зу дуллалисса хъуннасса даврихлу», – увкунни контр-адмирал, Каспийскаллал флотилиялул командирнал хъиривчу Игорь Никитиннул.
Гьарца шинал преподавательтал цала хушрай кумаг буллай бур кулпатирттаву нахIу-хIалимшивугу дурурччуну, хъаннин пишакаршиву лахьхьин дан, вайннал потенциал аьч бан.
Конференциялия махъ экспертътурал консультациярттал кумаграйхчил хъаннин гъира багьлай бур цивппа заллусса проектру хIасул дан.
«Жу вай конференцияртту хIасул дарду хъаннил цала тIалавшиннардайн бувну. Гьуртту хъанахъиминнал кIулшивуртту ласлай дур, дуклан най бур, цанма дакI гъансса цIу-цIусса дустал ляхълай бур. Ва кьяйдалий хIасул дуллай бур цала проектру.
Вайннал проектру зий дур щала билаятрай. Дагъусттаннай зий дур щалагу Аьрасатнал къулагъасран лайкьсса хъаннил чIярусса сиптарду. Жугу ляхълай буру вай сиптарду зузи дансса ххуллурду.
МахIачкъалалив хьусса конференциягу мунин кабакьу хьунссар. Жу вихну буру Дагъусттаннаясса душру-хъами флотирдал конференциярттай чялишну гьуртту хъанантIишиврийн», – увкунни Евгения Чибислул.
«Каспийская звезда» конференциялий, волонтертал хIисаврай, гьуртту хьунни Москавлиясса, Мурманскалиясса ва Дагъусттаннаясса урчIа преподаватель. Вайннал бувккунни цIуллу-сагъшиврийн, психологиялийн, оьрчIан кIулшиву дулаврийн, пишакаршиву ишла даврийн багьайсса лекцияртту.
Зулайхат Тахакьаева
