Мартрал 27-нния 29-ннийн бияннинсса гьантрай гужсса гъараллу ларчIун ЦIуссалакрал райондалий, цIуминалийсса ЦIуссаккуллал, Чапаевкаллал, ЦIуссалакрал шяраваллаву, чIявусса къатрал хIаятру, кIичIиртту щинавун бювкьунни.
Вай иширттацIун бавхIуну Дагъусттаннал премьер-министр Аьбдулмуслим Аьбдулмуслимов увкIунни ЦIуссаккуллал шяравун. Ванал ххал бунни цукун най дурив бювкьсса кIанттурду щинава буккан буллалисса давуртту, мукунма ххал бивгьунни цуксса зарал бивну бурив ЦIуссаккуллал шяраваллин.
Аьбдулмуслим Аьбдулмуслимовлущал шиккун бувкIунни вице-премьер Манвел Мажонц, райондалул бакIчи МаматIи ХIамзатов, шяраваллил хозяйствалул ва дуки-хIачIиялул министр Шамил Рамазанов, лак цIусса миналийн бизан баврил масъаларттаха зузисса Дагъусттаннал ХIукуматрал управлениялул хъунама Руслан МахIаммадов, Дагъусттаннал МЧС-рал хъунаманал хъиривчу Эльдар Атаев.
МаматIи ХIамзатовлул бусласимунийн бувну, щин ялтту ларгсса кIанттурду марцI буллай бур. Щин дачиншиврул марцI дуккан дуллай бур дренажрал системарду. Яла захIматмур тагьар дур ЦIуссаккуллал шяраву.
Райондалийсса тагьардания буслай, Аьбдулмуслим Аьбдулмуслимовлул кIицI лавгунни, чIявуми кIичIиртту ва багъру щиналу ливчIун бушиву, инсантал ялапар хъанахъисса къатран хъунмасса зарал къавхьушиву. Щиналу ливчIсса кIанттурдая щин дуккан дан хасъсса техника дакъассагу, дирхьуну дур ххюра насос ва ххюра помпа. Ванийну давуртту анавар дуккан дан бюхъантIиссар. Зараллу хьусса кIанттурдай хьхьу-кьини къаувкуну зий бур.
–Вай давурттацIун ЦIуссаккуллал шяраву бакьин бан багьлай бур ххуллурдугу. Дуллай буссар дренаж система. Укунсса ишру ттиния тинмай хьун къабитансса ххишаласса чаран ляхълай буссару, – увкунни премьер-министрнал.
