Учитель дакIний икIай оьрчIан, циксса шинну гьарчагу. ХIакьинусса кьинигу гьарица байрандалий Тагьират АьбдулвагьабовначIан бучIай цикссагу шиннардил хьхьичIва школа къуртал бувсса, утти цала оьрчIру, оьрчIал оьрчIру хьусса ванил учениктал.

Ккурккуллал шяравасса Аьбдулвагьаб Магьдиевлул душнил ТIагьират Идрисовал 60-нния лирчусса шинну хьуну дур оьрчIан кIулшивуртту ва тарбия дулаврил ххуллий зий. Оьрмулул шинну ларгун дунугу, я оьрчIан, я директорнан итабакьин къаччай, махъсса шиннардийнингу зийнма буссия.
Ккурклив арулва классгу бувккуну, ТIагьират бувххун бур Буйнакскаллал педагогикалул училищалувун, мунияр махъ –Дагъусттаннал педагогикалул институтрал филологиялул факультетрайн. Институтгу ххуйсса кьиматирттай къуртал бувну, бувкIун бур буттал шяравун. КIира шинай зий бивкIун бур Ккурккуллал школалий. Яла щар хьуну, шагьрулийн бивзун, ва бувкIун бур зун спортсмен­турансса школа-интернатрайн.

– Школа тIивтIуну бия 60-ку шиннардий февральданул 2-нний. Гьарица шинах лахъа-хъунну кIицI дайссия школалул гьану бивзсса кьини. Та чIумал школа-интернатрал директор ия Шамил Буттаевич тIисса лаккучу, мунал кьамул бувнав на даврийн, – буслай бур ТIагьират.
Шикку зий 25-30 шинну дурну махъ цамур кIанайн гьан багьну бур. Тагьиратлущал институтраву дуклай бивкIсса, ванил даража кIулсса Ума Муртузаьлиевал кIункIу бувну бур ва цила каялувши­ннаралусса аькьлу-кIулшилул махъун багьсса оьрчIансса ­(коррекционная школа восьмого вида) ­школалийн.

– ЦIу бутIуй школалул къатри хьхьирил зуманив, Буйнакскийл кIичIираву дуссия. ­Микку зий бунува, Сепаратор поселокрай цIусса, гьарта-гьарзасса къатри дуллай щиривкIуну бия Ума МахIаммадовна. ЧIявучин бавссар жул школалия. Танийрагу ххуйсса шартIру дусса школа буссия, цIанагу заманалуха лавхьхьуну, гьар цимурцаннул дузал бувну буссар. Шиккун заназисса оьрчIру циняв аькьлу-кIулшилул махъун багьсса бакъассар. Буссар укунмасса школардай кунмассагу. Ва школалиясса ца ттул ученик цIанасса чIумал Иваново шагьрулийсса хъунмасса фабрикалул цехрал хъунаману ур. Мудан ­оьвчайссар, байраннай барча байссара, – буслай бур ТIагьират Аьбдулвагьабовна. Ва ххуйну дакIний бур кIивагу школалул выпускниктуран. Ва школалийгу ванил учительнугу, методистнугу 30-ннийн диявайсса шинну дурну дур. ОьрчIан кIулшивуртту дулаврил ва ми тарбия баврил ххуллий бивхьусса захIматрахлу ва лайкь хьуну бур ХIурматрал грамотарттан ва Барчаллагьрал чагъардан.ТIагьират Аьбдулвагьабовна бур Аьрасатнал халкьуннан кIулшивуртту дулаврил отличник. Ва кIивагу цуппа зий бивкIсса школардал дуклаки оьрчIан яла ххирами учительтуравасса ца бур. ДакI-аьмал хъинсса, аьчухсса, цаманал буруккин лаласун кIулсса ТIагьират ххирар чIаххув-чIарахнангу, гъан-маччанан ва ласнал ляхъиндалунгу.

ТIагьират хъунма хьуну бур ряхва оьрчI бусса кулпатраву. Цинявппа оьрчIру дурккусса, халкьуннан кIулшивуртту дулаврил, элмулул ххуллий ва цайми арардаву хъунмасса захIмат бивхьусса инсантал бур. Хъунама уссу Аьвдуссалан, личIи-личIисса школардай учительну зийгу ивкIун, чIярусса шиннардий Аьрасатнал элмурдал академиялул Дагъусттаннал элмийсса центрданий зий ивкIун ур. Ва философиялул элмурдал кандидатри. КьурахIажи (аьпалухьхьун лавгунни) экономикалул элмурдал кандидат ия. МяйцIалку шиннардий Дагъусттаннал университетрал машлул факультетрал деканну уссия.Тамирлан тIима уссу Дагъусттаннал лайкь хьусса строитель ур. ПатIимат медициналул зузалар. ЧIярусса шинну дурссар МахIачкъалалив хъаннил консультациялий (№3) зий.
Ххуйсса къуллугърай зий, цащава шайсса кумаг инсантуран буллалисса, жяматран бусравсса икIайва ванил лас Давудгу. ЧIярусса шиннардий Дагнефтепродуктрал хъунаманал хъиривчувну уссия. Вайннал ца арс ва шама ­арснал оьрчI бур.
Арснал душ Асват ­Дагъустта­ннал медицина­лул университетрал стоматологиялул факультетгу къуртал бувну, Москавлив сий дусса клиникалий хьхьичIунсса пишакарнан ккаллину бур. Вагьабгу стоматологри. Ва цала пишалий МахIачкъалалив зий ур. ХIамзат Дагъусттаннал медициналул университетрал студент ур. Вайннан чIалачIин дакъар цала буттал ниттиха. Уссурссуннангу, гъан-маччанангу, выпускниктурангу ххирар ТIагьиратлучIа батIин, ихтилатрай щябикIан, ва рахIатсса, хъамал ххирасса, гьарнах къулагъас дан кIулсса буну тIий.
ЦIуллушиву дулуннав, чIярусса шиннардий ттигу мукунма цинявннан бусравну ва ххирану битаннав.

Андриана Аьбдуллаева