Зумаритавал барз къуртал хъанахъисса кьини, МахIачкъалив «Европа» тIисса банкетру бай залданувун бавтIун бия республикалул шагьрурдаясса ва цайми регионнаясса хъамалгу, лакрал шаннагу районнаясса агьалигу. Зал щапI куну бувцIуну бия. Ифтарданул сиптачиталну бия республикалул Муфтият ва шаннагу райондалул имамтал.
Аьдатравун багьсса куццуй, мажлис тIивтIунни мубараксса Кьуран буккаврийну. Дайдихьулий хъамаллуврайн оьвчаву дуллай, Муфтиятрал вакил МухIаммад Майрановлул бувсунни Рамазан зурул агьамшиврия ва кIицI бунни ялун нанисса ник диндалул кIулшивуртту куртI дуллай тарбия дуллан аьркиншиву. Ванал чIурчIав дунни чара бакъа миллатрал тарих куртIну лахьхьин буллан аьркиншиврий ва ниттил маз хьхьичIунну бикIан аьркиншиврий.
БавтIцири барча бунни республикалул экономикалул министр ХIажи Султановлул, Лакрал райондалул бакIчи Зураб Куччаевлул, жяматийсса ишккакку, МахIачкъалаллал Депутатътурал Мажлисрал каялувчи Марис Илиясовлул. СВО-лул Аьрасатнал Виричу НурмахIаммад ХIажимахIаммадовлул нину Сапижат Мазаевал кIицI лавгунни инсаннал оьрмулуву диндалул агьамсса кIану бугьайшиву, зумаритавал барз къуртал хьурчангу, ххуймур, хъинмур буллан дакIру мудангу кIункIу тIун аьркиншиву. Махъру лавхъунни Лакрал райондалул имам ХIабиб Батталовлул ва Ккуллал райондалул имам КьурбанмухIаммад МахIаммадовлул.
Ифтарданул сакиншинначитурал хIадур дурну дия авадансса программа. Залданул проекторданий ккаккан дунни ЦIуминалий буллалисса РувхIанийсса центрдания – Башларовлул цIанийсса мадрасалиясса видеосурат. ЦIуссалакрал райондалул имам Аьбдулла МахIаммадовлул бувсунни мадрасалуву Кьуран лахьхьин буллалаврицIун рувхIанийсса тарбия дулаву, мяърипат лахьхьин даву мурадрайсса давугу дуллантIишиву. Ниттил маз лахьхьин баврихгу дагьайкунсса къулагъас дикIантIишиву.
Экрандалия видеолий лакгу, Дагъусттаннал агьлугу барча бунни цIанакул СВО-лийсса МухIаммад-Маннар Бариевлулгу. Хъамаллурал бувсунни хъинсса насихIатру, вичIи дирхьунни дюххансса нашидирттах. ЛичIинува барчаллагь увкунни СВО-лий жанну дуллусса жагьилтурал нитти-буттахь ва гьуртту хъанахъиминнал кулпатирттахь. Ифтарданийн миннайнгу оьвкуну бия.
Гьай-гьай, хъамаллуран тIивтIуну бия жула миллатрал дукрарду дусса авадансса ссупра. Мажлисрал ахирданий циняв хIалану дурккунни салават. Дунни ххуйсса дуаьрду.
МахIаммад-Расул Оьмариев:
– Рамазан барз бусурманнансса дарсирдал барзри, мадрасар, школар. Зума дугьаврийну жунма, кьинилун кIийлва бунугу, ччатIул касакрал ва щинал ххувлул кьимат гьаз хъанахъиссар, ва ифтаргу жула цашиврул лишанни. Ххаришиврул чанна лархъсса симанну дур ва кIанай, Аллагьнайн вихсса инсантурал дакIурдил ххаришиву куннайх кув дачIлай, ца ххуйсса байрандалул асарду бур цинявннаву. Вайксса инсантуран ччатI бишинсса, укунсса даражалийсса мажлис бувансса даву бигьасса дакъассар, барчаллагь тIий ура, ва даврил сакиншинначитурахь ва ваниха зий бивкIцириннахь.
ПатIимат Зиркьуева, Дагъусттаннал Муфтиятрал Ккуллал райондалул Просвещениялул хъаннил отделданул хъунмур:
– Хъуннасса ххаришиву дур залданувун чIявусса агьали бавтIун тIий. Ца инсан щяикIайсса кIану бачIва къаливчIунни. Ва иширалгу чIалачIи буллалиссар диндалулгу, байрандалулгу хIурмат бушиву, жула миллатрахгу ччаву душиву. Дургьуцириннал зумардугу кьамулсса хьуннав! Уттиния тихуннайгу ва мубараксса байран чIярусса шиннардий хьунадакьлансса каши гьарманахьхьун Аллагьнал дулуннав, дакIру имандалул дуцIиннав. Бувсса цадакьартту Аллагьнал кьамул буваннав, дунияллий дакьаву хьуннав. Лакрал миллатрангу, дунияллийцири бусурманнангу Аллагьнал хъинмур чивчуну лякъиннав.
ПатIимат Рамазанова
