Мюрщими классирттаву дуклакисса шинну. Асардая къалагайсса алхIаткьини-бигьалагай кьини, кIюрххил урчIра ссятраву радиолувух дайдишайссия «ЧитIу» тIисса оьрчIансса лакрал радиолул передача.
ДакIнин багьрив оьрчIал хорданул балай? – «Вяркъу къянив лавгуна тIар».
Ва лелуххантрал ва жанавартрал чIурдугу хIала буллай, оьрчIал лап усттарну учайсса ляличIисса балайлух вичIилий цими ник хъунна къархьухьунссар? ТIутIи байвав ва балай жувагу музыкалул дарсирдай. Буссар ва балай радиолувух учин тIайлабацIу хьусса «цIурттигу». Яла шинну ларгун махъ, студент заманнайя кIул хьунтIисса ттун, гай бивкIшиву хIакьсса педагог-энтузиаст Шагьимардан Акниевлул «цIуртти». Ялая кIул хьунтIисса Шагьимардан Акниев, аьпа биву, цу ивкIссарив, ганал сипталий хIасул дурну диркIсса Ухссавнил Ккавкказнаву цалчинсса оьрчIал хордания. Гьамин, Акниев ушиву Лакрал гимнрал музыкалул автор, га ивкIшиву гьунар бусса аслийсса композитор, шаэр, усттарну мандолина бищайсса музыкант. ХIасил, гьунардал мяъдан. Буниялсса бия Шагьимардан Акниевлул хIакъираву жула хъунасса композитор Ширвани Чаллаевлул бищайсса кьимат.
Шагьимардан Акниевлул дарсру дирхьуминнал, ванал хордануву балай тIий бивкIминнал бусаврийн бувну, га хъун хъанахъисса никиран тарбия дуллай ивкIун ур халкьуннал творчествалул куртIсса мархрай, лакку билаятрал магьирлугърал ирсирах ччаву дуну.
Халкьуннал балайрду, къавтIавуртту, магьри, канил сянатру – вай цимурцаннулли оьрчIал дакIнил дуниял авадан дуллалисса, вайннаву ппухълуннал аьдатирттал хIурмат тарбия буллалисса.
Халкьуннал творчествалулли оьрчIан лагмасса дунияллул ххуйшиву тIитIин дуллалисса, творчествалул пикри итххяххан буллалисса. Магьирлугърайхчилли оьрчIан оьрму, цала халкьуннал тарих кIул хъанахъисса. Школалий дуклай ивкIсса шиннардий «Пионертурал къатлувун» занай музыка бищаврил гьунар бусса, миллатрал литературалухух ва магьирлугърахух лавгун ивкIсса Лакрал райондалул бакIчи Зураб Куччаевлул Гъумучиял оьрчIал магьирлугърал школалул зузалтращалсса совещаниялий каялувчитурал ва тарбиячитурал хьхьичl бивхьунни тIалавшин хъуннасса масъала – кьянкьа дан школалийн заназисса оьрчIахсса къулагъас, гьарза дан миккун заназиминнал аьдад. Буккан буллан ми паччахIлугърал даражалийсса мероприятиярттайн «Магьирлугъ оьрчIава дуккан ритарча, мунил бугьансса кIану миннал дакIурдиву ва няраву цайми пикрирдал бугьлан бикIайссар», – увкунни Зураб Куччаевлул.
Совещаниялия махъ Зураб ХIусайновичлущалсса ихтилатраву ххуйсса маслихIат ккавккунни, хоргу цIу дуккан дурну, мунин Шагьимардан Акниевлул цIа дизан.
Зулайхат Тахакьаева
