Июль зурул 15-нний ДР-лул ХIукуматрал председательнал цалчинма хъиривчу Анатолий Карибовлул каялувшиндаралу хьунни Ухссавнил Ккавкказуллал «Машук-2016» жагьилтурал форумрай гьуртту хьунтIисса Дагъусттаннал делегациялул хIадуршиннардал хIакъиравусса батIаву.

И. Саидова
Микку ххал бивгьунни «Машук-2016» форумрай гьурттушинна дансса жагьилтал язи бугьаврил, республикалул делегациялул цинна хасъсса лишан сакин даврил, Республикалул кьинилун хасъсса дяхттасса ва гьанттайннайсса мероприятияртту хIасул даврин хас бувсса масъалартту.
Жагьилтурал форумрал сакиншиндарал комитетрал члентурахь Анатолий Карибовлул бувсунни уттинин хьусса форумирттай гьуртту хъанай биялсса опыт бушиву ва ми масъалартту щаллу бан чялиш буккан аьркиншиву.
— Жува, так ца грантру ласаву дакъассагу, хIарачат бан аьркинссар республикалул цIа лайкьсса даражалий ккаккан дуван. Форумрай Дагъусттаннал жагьилтал цимигу даражалул хьхьичIунну бикIан аьркинссар. Му бакъассагу, жува хIарачат бан аьркинссар форумрал лагрулуву август зурул 10-нний хьунтIисса Дагъусттаннал кьини лайкьну тIайла дуккан. БувкIсса хъамаллуран ва гьурттучитуран ккаккан буван аьркинссар дагъусттаннал авадансса тарих, аьдатру ва багьу-бизу. Му кьинисса байрандалул сий гьаз дувантIиссар авадансса концертрал программалул, — увкунни Анатолий Карибовлул.
ДР-лул Жагьилтурал комитетрал председатель Арсен ХIажиевлул бувсунни министерствалул форумрайн дурсса цинярдагу хIадуршиннардая.
— «Машук-2016» форумрай гьурттушинна дансса жагьилтал язи бугьаву мурадрай, министерствалул, февраль зуруя шихунмай байбивхьуну, циняв муниципал идарарттай 2000-ннийн бивсса жагьилтал гьуртту хъанахъисса «предмашуки» тIисса форумру буллай бивкIссар. Вай мероприятиярттал хIасиллайн бувну увчIуссар гьашинусса форумрай гьурттушинна дантIисса 450 инсан, — увкунни Арсен ХIажиевлул.
Мукунма ванал бувсунни форумрай кIицI лаглагисса Республикалул кьини сакин баншиву республикалул халкьуннал творчество, культура, багьу-бизу ккаккан буллалисса майданну.
— Республикалул кьини лайкьну тIайла дуккаву мурадрай, министерствалул циняв кIулшивуртту дулаврил муниципал идарарттайн тIайла бувкссар гьурттушинна даву тIалав буллалисса чагъарду.
БатIаврил ахирданий Арсен ХIажиевлул барчаллагь увкунни форумрал даврил мудан чIарав ацIайсса ДР-лул ХIукуматрал председательнал цалчинма хъиривчу Анатолий Карибовлухь.
«Машук-2016» форум байбихьлахьиссар Пятигорск шагьрулий август зурул 5-нний, лахъи лагантIиссар августрал 19-ннийн бияннин.