Хъуннасса сийлий шай гьарцагу шинал Лакрал театрданул «Интнил хьхьунин» хас дурсса концертру, хъинну яргсса, авадансса дикIай мунил программа: аслийсса халкьуннал балайрду, тIуркIурду, къавтIавуртту.

Цаппара шиннардил хьхьичI «Интнил хьхьунил» проект лайкь хьуссар Аьрасатнал Театрал ишккаккултрал союзрал сакин бувсса «Грани театра масс» тIисса, щалагу Аьрасатнал конкурсрал дипломран «Лучший национальный праздник» номинациялий.
Циван ххирар агьалинан Лакрал театрданул программардаву ляличIину «Интнил хьхьунил» программа чирча, му так хъярч-махсарардал, тIуркIурдал, балайрдал ва къавтIавурттал авадансса душивруцIун, агьалинан дакIнин дичай хъамадитала хъанахъисса аьдатру, лаххия. Исвагьину даркьуну дия жула артистътурай чиллу-чухъри, бузмарду, чалагъайртту ва хара-лачакру, лархминнал журат ххуй дуллай, цIу-цIанпIир ххи буллай бия.
Лакрал театрданул проектирдай гьуртту хьун гъирарай бучIай цIанихсса балайчиталгу, сахIналийн дахьва буклакисса балайчиталгу. «Интнил хьхьунил» программалул муданмасса хъамалли тамашачитурангу ххирасса Загьидат Муслимова, Карин ва Диана Кьадинаевхъул, Жанна Кьурбанова. Гьуртту хьунни ва базилухь АхIмад АхIмадов, цIанихсса музыкантътурал ва балайчитурал ирсираясса ХIанипа Дибиров, ванал балайрду цивппагу халкьуннан унгу-унгусса бахшишну хьунни.
Программалий гьурттуну бия театрданул сайки цинявппа артистътал ва балетрал труппа. МиннацIун сахIналийн бувккун, миллатрал лаххиялуву балайрдахун къавтIий, концертрал сий хъун дан цащава бюхъайссаксса хIарачат буллай бия артистътурал оьрчIругу.
Дайдирхьуна концерт Арслан Шагьмардановлул «Интнихасса» балайлул хорданийну.
Къуртал дуруна театрданул балетрал къавтIалтрал щаллу дурсса «Къирият» тIисса аслийсса лакку къавтIаврийну, къуманал дакIру аьч дуллалисса, гьавас бутлатисса. Постановщик Аьрасатнал лайкь хьусса артист Муса Оздоев. Муданна кунна, усттарну концерт дачин дурну бия Дагъусттаннал халкьуннал артистътал Шамсуттин Къапланов ва Саният Рамазанова.
Сайки шанна ссятрайсса концерт дайдирхьуну къуртал хьунцIа балайчитурахун руцлай бия цIанихсса музыкантътал: Арслан Шахмарданов (гармонь), ХIусайна ХIусайнаев (зюннав), Саддам АхIмадов (синтезатор). ХIадур дурну дия концерт ­Аьрасатнал лайкь хьусса артист Аслан МахIаммадовлул.

Зулайхат Тахакьаева