Мартрал 18-нний Дагъусттаннал бакIчи Сергей Меликовлул ва Аьрасатнал Экспортрал центрданул гендиректор (РЭЦ) Вероника Никишинал къулбасру дунни хIала-гьурттуну зузаврил хIакъиравусса кьутIи-соглашениялий.

Документрай тасттикь бувну бур кIивагу чул уртакьну зунтIишиву республикалул экспортрал каши-кьудрат лахъ даврил ва кIанттул производительтуран паччахIлугърал чулухасса кумаг хъун баврил масъаларттаха.
Вероника Никишинал бувсунни, му ххуллий регион хъинну зий бушиву. Ванил тIимунийну, 2025 шинал Экспортрал центрданул Дагъусттаннал 84 компаниялун дурну дур 150-нниха лирчусса хIаллахшинну, кьутIи чирчуния махъ тIурча, кумаг баврил лагру хъун хьунтIий дур.
Сергей Меликовлул бувсунни республикалул тамансса каширду душиву промышленностьраву, шяраваллил хозяйствалуву ва туризмалуву, мукунна чIярусса каширду душиву логистикалуву, «Север-Юг» транспортрал коридорданувун хIала шаврийну. Республикалул бакIчинал тIимунийну, ларгмур шинал Дагъусттаннай лавайсса даражалий бартдиргьуну дур «Дунияллул дянивсса кооперация ва экспорт» нацпроектрал ккаккияртту. ЦIусса кьутIи-соглашениялийгу ккаккан бувну бур «Аьрасатнаву дурссар» тIисса национал бренд лядуккан даву ва хушрай сертификация дурсса кIанттул компанияртту гьарза баву.