Мартрал 19-нний Дагъусттаннал шяраваллил хозяйствалул ва бакIлахърулул министр Шамил Рамазанов увкIунни Кочубейллал зоналийсса даэрдайн, чIиру баврил тагьарданущал кIул хьун.
Министрнащал архIал бувкIунни ванал хъиривчу Шамил Жамалов ва республикалул кIинтнил даэрдал управлениялул каялувчи Наби АьбдулхIамидов.
Миннал ххал дунни чIиру буллалаврил, лазундарал лащу-щаллушиврул тагьар. «Абдурахманова Индира» тIисса хозяйствалуву бур 106 хъуни гъаттара ва 1,7 азарва бакI яттил. Ва хозяйствалуву бувну бур 1,3 азарва чIи ва бярч, яхьуну бур 99% лувгъишиврул.
Шамил Разановлул бувсунни Кочубейллал зоналий цIанасса ппурттуву лухччал тагьар ххуйсса душиву ва гьава ризкьилуцIун бавкьусса бушиву. Мунияту ризкьичитураща бюхълай бур кIинттул ххуйсса даражалий ризкьигу ябувну интту цIуллу-сагъсса бярчру-чIиругу ласун.
ХIасан Аьдилов
