Юсуп Хаппалаев
Маннархъал Мусаха
КIиямаксса оьнтIуллув
КIамаксса халкьуннаву,
ХIакьсса нарт хьунна ина,
Лахъ бувну миллат вила.
Агь, машаллагь, машаллагь,
Машаллагь, Маннар Муса!
Аспироз, Мирихрайнгу
Левххун найгу ккакканнав!
Агь, барчаллагь, барчаллагь,
Барчаллагь, Маннар Муса!
Аспироз, Мирихрайнгу
Левххун найгу ккакканнав!
Дякъил ккарччив хъякусса
КIи дайдихьулул кьини,
Инт дучIаншиву буслай,
Космосрайн левхсса читIуй.
ЦIурттал хъюрдайнсса ссапар
ТIайлабацIусса хьуннав!
Ина лавгсса магистраль
ХъункIултIутIан ххяхханнав!
Хор дунни Ккавкказуллал
Зунттал, ардал, хьхьирирдал:
– Жул лачин – ххира Муса!
Жул пахрур – Маннар Муса!
Мурад чаннар ниттихъал:
ХIурмат лахъсса наслу бан!
Хиял лахъри душваврал:
Ссав мютIи дай арсру бан!
Агь, машаллагь, машаллагь,
Машаллагь, Маннар Муса!
Аспироз, Мирихрайнгу
Левххун найгу ккакканнав!
Агь, барчаллагь, барчаллагь,
Барчаллагь, Маннар Муса!
Аспироз, Мирихрайнгу
Левххун найгу ккакканнав!
Аткъай Аджаматов
Маннаров Аьламраву
Шагьрурдай ва щархъаву
Халкь бур аьлагъужалий,
Куннал кув барча буллай,
Хъяй бур гьарца кучалий.
Аьламравун левхссар тIар
Ца лаккучу, Маннаров,
Лавхъун, чанна бувссар тIар
Дунияллул минара.
Ча увкссар кIа Маннаров,
ЛухIи ссирссилтту Муса,
АбутIалибгу акъар,
Увккун, шеърирдай бусан.
Ча укканссар лаккучу,
КIалай куна, чаннасса –
Къалайчинал, заргалнал
КьютIилттула акъасса!
Ссурулунгу урувгун,
Чугур бища, Чаллаев,
Валлагь, кIагу хъина тIий,
КъавтIун изу, Къажлаев!
Пар-пар тIий дур вирттаврай
Мусал гьан дурсса нурду,
Ххаришиврул къавтIий бур
Къапкъазуллал зунттурду!
Къумукь мазрая.
Таржума М-З. Аминовлул
МахIаммад-Загьид Аминов
Ххуллухъин баннав, Мусай!
ЦIарал буран ххурхху тIий,
ЦIусса жами лавсун най,
Хъирив бурувгсса жугу
Циняв буру ссавруннай!
Ххуллухъин баннав, Мусай,
Мяйлчинмур ссавний хъянгу,
ЛухIи-цIансса аьламрал
ЦIаннай чани лахъангу!
ЦIакьсса бур вил гьалмахтал –
Оьрус миллатрал арсру,
Ларайсса дур кIулшигу –
Та Гагариннул дарсру.
Левххун най ура ина –
Туннурдаву оь бацIлай,
Дагьну нани аьрщарал
КIушиву къюкIлийн дагьлай.
Левххун най ура ина
Муххал ва цIарал щютIлий,
ЦучIав щак тIий къаитан
Зунтталчунал бюхъулий.
БикIувча му гьунаргу
ОьрчIал оьрчIахъай буслан:
Хъиннува бюхттул бунни
Ина жула Дагъусттан.
Ххуллухъин баннав, Мусай,
Мяйлчинмур ссавний хъянгу,
ЛухIи-цIансса аьламрал
ЦIаннай чани лахъангу!
Нураттин Юсупов
ЦIурттаяр бюхттул дунни
ОьрчIал цайнува цала
Цалчинмур ша лавсукун,
Га ххаришиврун лавсъсса
Ша хьуннавча увкуну,
ШанбачIулий бачIлансса
Бакъухърал аьму байсса.
Аьдат дур жула лакрал.
Мусай, ина космосрайн
Цалчин левххун лавгукун,
Вил дакI кьянкьашиврия
Ххарисса Дагъусттаннай,
Бакъухъирттал бушкъапру
Дурхьунссар гьарца тIювай.
Уттинин ина ияв
Ххираманахъал арсну,
ЧIаххувсса щархъангума
Муксса акъаяв кIулну.
Аьрщарая гьаз хьуну,
Левххун лавгун космосрайн,
Утти кIура авунна
Дунияллул вакилнайн.
Хъунзунттуя ябивтун,
Янин ххал къашайнугу,
Ххал хъанай ура цIана
Гьарнан цала къатлуву.
Дунияллийсса мазру
Циняв вин къакIулнугу,
Тти цинявннан бувчIлай бур
Му вил зумату бувкмур.
Ссирссилттайх кахгу куну,
Левххун лавгун цIурттачIан,
ЦIурттаяр бюхттул дунни
Вила ва миллатрал цIа.
Чичлай бур шаэрталгу
Барчаллагьрал балайрду,
Къахьунххурав ттулмургу
Ми балайрдал ца ххану.
Миясат Щурпаева
Барчаллагь вин, Мусай!
Барча хьуннав ЦIусса шин,
ЦIурттачIа хьунадаркьсса,
Дагъусттан бюхттул бувсса
БакI аькьилсса лаккучу!
Зунттаха ххал къашайсса,
Вил буттал шяравалу
Щаллара дунияллун
Ина ккаккан дурунни.
ЧIявуссаннан къакIулсса
ЧIивисса лакрал миллат
Щалвава ил-аьламрайх
Ина машгьур бувунни.
Агь, барчаллагь, барчаллагь,
Аслансса гьухъалий оьрчI,
Ссавнийн лахъавунияр
УчIаву шадсса хьуннав!
Абачара ХIусайнаев
КIийн нанима лас ччива
ЧIа тIий ура Муса Маннаровлул ниттин ва кулпатран
Ссавний Гагарин ия,
Дунъяллул лагма уклай,
Щяв, шилу, циняв бия,
ТIанкIа тIий, ххарил лехлай.
Та кьини, кьунниялай,
Душ бия щар хьуну най.
КIийн нанима лас ччива,
Та жалин-душнил тIива.
Шин космосраву руртун,
Чув цIуллу-сагъну ия,
Жип чанна цIурттал дурцIун,
КIа щяв ликлан най ия.
Хьуна арснан кьура шин,
Аргъирай бия жалин,
КIия увкIма арс ччива,
Та жалиндалул тIива.
Кьамул бувунни дакIнил
Дагъусттан зунттал душнил
Гьан итан лас аьрххилий,
Нигьал ва хьуллил хьунийн.
ХьунтIиссар ссавургу дан
Ниттища, учIаннин арс,
Лавсун жунма ссайгъатран
Ссавнияту баргъ ва барз.
ХIажимурад ХIажиев
Лакрал икартал
Аьвзалзаманнайва инсаннал хиял
Бияйсса бивкIссари архсса цIурттачIан,
Мякьнугу бивкIссари аькьлугу мунал
Аьламрал кьюлтIшиву ашкара дуван.
Ссавнил дагьанттувух дакIгу дайдитлай,
Бургайсса бивкIссар гай бургъи-зурувун.
Бюхттулну лехлайсса барзуй мяш хъанай,
Хьурдай тIий бивкIссари ссурулун гьаз хьун.
Танийва, азаллий шанттуршку шинал,
Кьуватсса хъаругу хъачIунттай ларчIун,
Зунттал барзул дакIсса ца зунттал жагьил
Бюхттулсса Щунуя ссавнийн гьаз хьуссар.
Гьаз хьуссар та жагьил бюхттул ссурулун,
МуркIа хьуссар жагьил, агьну ххяллавун,
Амма цала аьпа кьабивтссар махънан,
Хъаттирдал кьуватгу – лакрал вирттавран.
ЧIивисса бунугу ттул ххира миллат,
ЧIявусса буссари гьанурду мунил,
Миллат бюхттул бансса батирнал гьунар
Вана ттигу бунни Маннархъал Мусал.
Миллатрал пахрулун лайкь хьусса къучагъ,
Левххунни цIурттачIан мусил жамилий.
Левххунни лаккучу аьламрал ардайн,
Ссурулун хъит дурсса ГъартIул хъаттирдай.
Хьурдай гьаттардива тти бизан буван
Ккурккуллал Зайдилав, Гузунхъал ХIасан,
Аьлам лахьлай бивкIсса лакрал аьлимтал,
Аьламравун левхсса цала арс ккаккан.
Хьурдай уттава бан игитсса вирттал
Аминтахъал Наби, АхIмад-Хан Султан.
Аман, Къалалия Къайдар урган ан,
Бюхттулну гьаз хьусса чIаххувчу ххал ан.
Жамалуттин Дагирманов
Пахру ба, Лакрал улчай!
Вил миллат чансса бур, цIа машгьурсса дур,
Машгьур дан бюхъайсса буну тIий вирттал.
Пагьму-гьунардугу лап бусравсса бур,
Бусравшиву кIулсса буну тIий нартътал.
ХIавинахъал Саэд, Саэдхъал Гьарун,
Инкьилабрал аьскар – миннал гьалмахтал.
Мусил цIуртти лавсъсса ххюя лаккучу –
Лайкьссар вин пахру бан,
ттул Лакрал улчай.
Зунттал барзул биза ссурула бувну,
Ссав хIайран дуванну лахъну тIанкI дурну,
Дуниял мяш хьусса гьунар бувусса
Аминтахъал Наби – гьарнансса пахру.
Ссавруннал пагьламан АхIмад-Хан Султан,
Душмантал къир байсса къучагъсса инсан:
Гьаваллавн гьаз хьусса кIулшайхту лачин,
Уххан кIану бакъа личIайва язид.
Космосравун левххун, таварих чичин,
Хьул бивхьу умудрал мурадрайн иян,
Тавба дурну увксса Маннархъал Мусай,
Ина гьаз дунни сий лакрал миллатрал.
Къапихъал Апанни сагъну уния,
Санаъ дуванссия назмурдал чарслуй,
Чаринхъал МухIуттин изан увния,
Мажлис батIинссия лакрал вирттаврал.
ПатIимат МухIуева
* * *
Пахру-ххаралийнмасса
Лакрал бюхттул зунттурду
Хъиннува парх увкунни,
Хъиннува бюхттул хьунни.
Вин хъунмасса барчаллагь,
Виричусса жул Мусай,
Жул гьарца ниттил дакIний
Арсну кьамул хьусса оьрчI.
Вил буттангу барчаллагь,
Вил ниттингу барчаллагь,
Муса, ина уллусса
Миллатрангу барчаллагь.
Салимат Кьурбанова
Маннархъал Мусахь
Ттуруллул кьяпагу бакIрай бивхьуну,
Ттурлу хьуну, ина левххун лавгунна,
Ттуруллува бувк баргъ яргну гъилиссар,
Гъили бунни ина щалва Дагъусттан.
Абадсса оьрмулийн вил ка дирукун,
Пахрулий гьаз дунни вирттаврал бакIру.
Лакрал уздан цIуртти пперхатIи бувнал
ЦIурттайх ттигу цIарал варакь дурккунни.
Миллатрал дакIурдий кюру бувунни,
Цинявннал арс-уссу вияту хьунни,
Ина ка тIиртIувкун чаннамур цIукуйн,
МикIирал зунттурду бавссун лавгунни.
ДакIниву цIу дунал, инсаншив кIулнал,
ХIарачат бувайссар оьрму чанна бан,
Ияннав инагу дакIнил мурадрайн,
УчIаннав жул ялун гъили баргъ куна.
Оьрмулул хьхьиривух ина авчукун,
Ил-аьламрал дакIру чанна лархъунни,
Ухьттан барзу куна ссурулух лехлай,
Лакрал уздансса цIа цIулаган дунни.
ХIабиб Аьлиев
КIа вил арсри, Дагъусттан!
Дунияллий машгьурсса
Зунттал кIану Дагъусттан,
Вана ттигу ца балай
Вил барзунттал савлугъран:
Вил къучагъ, левххун лавгун
ЦIаран лавхъсса гьавасрай,
ЦIана бюхттул цIурттащал
Гъалгъа тIий ур вил мазрай!
Дагъусттан, кIари цIана
Вил аьшукьгу, вил арсру –
Вил барзултрал кьюкьлувун
Бувкссар ттигу ца барзу.
Ссавруннал аьрш-куршливу
Пар-пар тIий бур авурсса
Вил яругу, вил пишгу,
Ссирссилттугу къудурсса.
Вил къюкIгу ришлай дуссар
Вил арснал хъазамраву,
Вил пикригу зий буссар
Арснащал аьламраву.
Мукун бюхттул бувссара
Арснал ина, Дагъусттан,
Гьай, жан, тIутIайх бичлачу
Арсурваврал савлугъран!
Дарги мазрая.
Таржума М.-З. Аминовлул
