Ларгсса нюжмардий Дагъусттаннал Халкьуннал Мажлисрал хъунама Заур Аскандаров ивунни МахIачкъалаливсса ОьрчIансса республикалул азарханалийн. Ванащал бия ТОФМС-рал ва ЦIуллушиву дуруччай министерствалул вакилталгу.
Поликлиникалул хъунмур хIакин ПатIимат Башировал хъамаллуран экскурсия бувну, кабинетирттавух буклай бунува, бувсуна щаллагу республикалиясса оьрчIру ккарччив хъин дуван бучIайшиву цачIанма, мукунма захIматсса тагьар дусса оьрчIругу бучIайшиву. Бувсунни поликлиникалий къумашиву душиврия рязи бакъа бикIайшиву хъин хьун бучIайми.
«Гьарца кьини поликлиникалул кьамул бувайссар 200-нния ливчусса чIава пациентътал, амма хIакинтурал кумаграх мюхтажсса оьрчIру чIявушиврул, цаппарассаннан нюжмардий ялугьлан багьай», – увкунни ванил.
«Щалагу республикалия хъин хьун оьрчIру бучIайсса поликлиника гьармунил дузалсса, ттизаманнул даражалий къулайсса бикIан аьркинссар. ЧIалай бур хIакинтуран вай къумасса кабинетирттаву зун бигьа бакъашиву, укун бикIан къааьркинссар», – увкунни парламентрал хъунаманал.
Циняв кабинетирттавух буккайхту, тиккура дунни тагьар ххал дигьлагьисса совещаниягу. ПатIимат Башировал маслихIат бунни, гьарза-гьартагу бувну, поликлиникалул гьанулий кафедра ва ординатура тIитIин.
Дагъусттаннал медициналул университетрал ректор Висимпаша Ханаьлиевлул бувсунни ординатуралулмур масъала бартбигьинтIишиву, оьрчIансса стоматологиялунсса кIантту хъиривмур дуккаврил шиналнин тIалав бантIишиву. Парламентрал депутат, ЦIуллу-сагъшиврул, захIматрал ва социал политикалул масъалартталсса буллалисса комитетрал каялувчи Илияс Мяммаевлул маслихIат бунни помещениялул арендалух дучIаймур поликлинакалул маэшат гьаз буван харж дуллан.
«Нигь дакъа, вас-ццах бакъа оьрчIру ккарччив хъин дуван бучIайсса даражалийсса шартIру щаллу дуван аьркинссар жура, уттизаманнул оборудование, аьркинсса техникагу дучIан дурну, зун гъира бусса пишакарталгу тIалав бувну. ОьрчIансса стоматологтал биял хъанай бакъашиврий чIурчIав дуллай буру жува. Выпускниктал цивппа оьрчIал ккарччал духтуртал хьун кIункIу хьуннин тинмайну бацIан къашайссар. Республикалул поликлиника хIакинтуралгу, гьармунилгу дузалну бикIан аьркинссар. Районнайсса, шяраваллавусса оьрчIангу багьайсса ка-кумаг булланшиврул, хIакинтурансса семинарду, мастер-классругу буллансса чарангу лякъин аьркинни, кумаграл бригадартту шяраваллавун биявансса ишгу буван аьркинни», – увкунни парламентрал спикернал. Ванал тапшур бунни парламентрал ирглийсса заседаниялий ОьрчIансса стоматологиялул даву гьаз даврил хIакъиравусса цаймигу аьщуйн щусса предложенияртту ххал дигьин.
ПатIимат Рамазанова
