Жу уттинингу чивчуссия Украиннаву Аьрасатнал билаятрал мурадру бартбигьлай талатиминнан гуманитар кумаг буллалисса ЧIяйннал шяравасса, уздансса хъамитайпа ХIамидлул душ Бадуржигьан Рамазановая.

Хасъсса аьралий операция байбивхьуния шийнмай аьралийтуран цила карунних дурсса нахIура-нахIусса дукрарду тIайла дуклай бур Бадуржигьан. Ванил аьралийтуран буллалисса кумаг ххаралунсса бакъарча, дакIнийхтунусса бур. Ххувшаву ласунцIакул Бадуржигьаннул цила пенсия аьралийтуран кумагран буллан цIакуну бур. Букъавсун къабучIир, сахаватлувсса, дугърисса давурттив дуллалисса хъамитайпа цIуллушиврулгу кьянкьасса бакъашиву, оьрмулулгу чIивисса бакъашиву. Къашавай хьуну махъ, хIакинтурал Бадуржигьаннуй хъунмасса хIаллай гъилисса пачличIа къабацIансса къадагъа дирхьуну дур. Бадуржигьаннуща тIурча, бюхълай бакъар захIматсса тагьардануву аьра­лий буржру бартбигьлагьи­сса оьрчIая пикри бакъа бикIан. Ванил цурда ца байран лях гьан къаритай аьралийтуран цила чулухасса ссайгъатру гьан къабув­сса. Цила дуллалисса давурттаягу ванин щинчIав кIул хьуну ччан къабикIай. Хъун хIал къавхьунни Бадуржигьаннул аьралийтуран генератор гьан бувну.
Зумаритавал байрандалул гьантрай, Бадуржигьаннул уттигу авадансса ссайгъатру хIадургу бувну, аьралийтурачIан тIайла бувккунни. Бадуржигьаннул аьра­лийтуран шавхьуну бия бакъухъ, аьрайн гьавккури. Бакъухъгу цила зумуну, нахIу-нацIурду дирхьуну, чIюлу бувну бия. Машан ларсун дия нахIура-нахIусса нис. НицIавух лагаву хIала дурну бакьин бувну бия туртул вивра. Бакъухъ, аьрайн гьавккури жула ужагъирттайвагу буллан бигьа бакъасса дукрарду дур. Бадуржигьаннул кIу къабивзун, хьхьуния-кьини дурну, аьра­лийтал ххари баву мурадрай, дурну дия лакку дукрарду. Мукунна машан ларсун дия ахъвазандалул сокрал упаковкартту, чассагул къуршив, чайлул пачкарду. Бадуржигьаннул укунмасса ссайгъат Ватан дуруччул байрандалул гьантрайгу гьан бунни.
Ниттил дуллалисса чумартсса даврицIун кабакьу буллай бур Бадуржигьаннул оьрчIругу. Вайнналгу арцуйнусса кумаг тIайла бувккунни хасъсса аьралий операциялий гьуртту хъанахъиминнан.

Бадуржигьаннул яхI-къи­риятрая ва чумартсса тIуллая кIул хьуну, ванищал хIала-гьурттуну зий бур Дагъусттаннал республикалийсса «Народный фронтрал» отделениялул, «Великая община» жяматийсса суккушиндарал вакилтал.
«Хасъсса аьралий операциялиясса видеортту ххал дуллалийни, ниттихъал дакIру къума лаглан дикIай. ЧIалай бур жула оьрчIал захIматшивурттахьхьун мадад къабуллуну, хъуннасса хъар лахълай бушиву. Ттуща къабювхъунни ва ххуллухьгу ттула чулуха кумаг къабувну бацIан. Жула оьрчIан ичIаллил дукра хъама къаританшиврул, шартIру дакъасса кIанттурдай ккашилну къабикIаншиврул пикри хьунни, дукангу нахIусса, чурххангу бувзсса, аслийсса лакку дукрарду дурну, тIайла дуккансса. Жувагу дакI цIуцIаву дуну бушиву, буруккинттарай бушиву ккаккан бан ччан бикIай. КIулну бикIийча, цумурцагу ниттил дакIнил гъилишивугу, чанигу Ватандалул мурадру буручлачисса цинявппагу аьралийтуран цачIушиву. Циняв жагьилтал цIуллуну-сагъну шаппай зана хьуннав, дяъвилул цIу лещаннав», – тIий бур Бадуржигьан.
Украиннал аьрщарай нанисса хасъсса аьралий операциялул гьурттучитуран кумаг баврихлу, Бадуржигьан лайкь хьуну бур «Команда Путина» премиялун, Халкьуннал фронтрал чулухасса наградарттан, Аьрасатнал ДУМ-рал чулухасса «За заслуги» медальданун ва Дагъусттаннал бакIчинал ва аьралийтурал чулухасса Барчаллагьрал чагъардан.
Укунсса ниттихъул махъ буссаксса, ххувшаву ласунсса вихшалагу хъиннура цIакь хъанай дур. Жула халкьуннал дугъришиврул, ка-кумаг бан хIадуршиврул, вайннал дуллалисса чумартсса тIуллал дакI дуллай дур ва гьавас бутлай бур аьралийтуравун.

Имара Саидова