Дагъусттаннал УФСИН-далул зузалт бивунни хасъсса аьралий операциялий жан дуллусса цала уртакь, виваллил къуллугърал подполковник Жабраил Жабраиловлул кулпатрачIан ва мунал гьаттайн.

Жабраил зий уссия Ямало-Ненецкаллал автономный округрал ФСИН-далул управлениялий. Ванал гъан-маччаначIан биян нанисса делегациялул бакI дургьума ия Дагъусттаннал УФСИН-далул хъунаманал хъиривчу Рашид Зайнулаьбидов. Аьрххилул мурад бия къучагънал кулпатран цала чулуха кумаг баву ва аьралий дуснал аьпа учаву. Цал делегация бивунни хIаписарнал ниттичIан. Ва МахIачкъалалив ялапар хъанай дур. Ниттил дакI данмургу бувсун, Рашид Зайнулаьбидовлул, Дагъусттаннал УФСИН-далул хъунама, виваллил къуллугърал генерал-майор Сергей Ролдугиннул ва Ямало- Ненецкий автономный округрал УФСИН-далул хъунама, виваллил къуллугърал полковник Игорь Ракитиннул цIания барчаллагь увкунни ниттихь ххаллилсса арс тарбия аврихлу.

Мунияр махъ вай лавгунни къучагънал гьаттайн биян Лакрал райондалийн, Хъунайннал шяравун. Аьпалул мажлисрай гьуртту хьунни Хъунайннал шяраваллил бакIчи ХIажи ХIажиев, школалул директор МахIаммад Хъунбуттаев ва шяраваллил жямат.
Вайннал дирхьунни тIутIив виричунал гьаттацI ва баян бунни мунал аьпалун минутрайсса пахъ багьаву.
Ихтилат бувсса цинявнналагу кIицI лавгунни уголовно-исполнительный системалул зузалал чувшиву ялун нанисса никиран эбратну хьунтIишиву.
– Жу бувкIру хасъсса аьралий операциялий чувшиврий жан дулусса жула уртакьнал аьпа учин, махъва-махъсса ссихIирачIа цала бувсса хъалийн хаин къавхьусса къучагъ дакIнин утан, – увкунни Рашид Зайнулаьбидовлул.

КIицI лаган, хасъсса аьралий операциялий жан дуллуну дур Хъунайннал шяравасса цамагу къучагънал. Ва кьини УФСИН-далул зузалтрал мунал буттахьгу дакI данмур бувсунни.

Делегация шяравун бучIаврил цал ттигу исват буллай бур ватан дуручлай жанну дуллуми хъамакъабитантIишиву, миннал кулпатру цахунма цивппа бивчуну къаличIантIишиву, ми мудангу аякьалулу бикIантIишиву.