Гьарица шинал «Сепаратор» ЗАО-лул вакилтал гьуртту хьуртту шай Москавлив хъанахъисса Дунияллул халкьуннал дянивсса «Dairy tech» тIисса накI-нис дуккайсса оборудованиялул выставкарттай. ХIакьину МахIачкъалаливсса «Сепаратор» ЗАО-лий каялувшиву дуллай ур Аьхъардал шяравасса МахIаммадлул арс ХIасан ХIасанов.

Ванал каялувшиндаралусса предприятие дунияллул даражалий махъ нанисса компаниялун ккаллину дур.
Вай выставкарттай вайннал цимивагу диплом лайкь бувну бур. Заводрал бюхъу-даража кIул хьуну, вайннащал хIала-гьурттуну зунсса мурадрай букIлай бур вайнначIан личIи-личIисса хIукуматирттаясса муштаритал. Мунин барану хьунни Беларусьнал предприятиялул ва заводращал хIала-гьурттуну зунсса кьутIи чичаву. Беларусьнал заводирттай гьарица кьини итадакьлай бур тоннардайсса накI-нисирал продукция. Лагаву дайсса ца цехравусса оборудование дур Дагъусттаннаясса.
– Дунияллул халкьуннал дянивсса выставкарттай жу кIул хьуру «Сепаратор» ЗАО-лул вакилтуращал. Заводрал ветерантурал жун ккаккан бувна сепараторду, кIул бувна миннул биялалущал. Ларгсса шинал жул производствалуву зузи бувссар Дагъусттаннаясса сепараторду. Вайннуй суткалий итадакьлай буссар 82,5 % аьгъушиврул дусса 26 тонна нагьлил. Аьрасатнал ва чил билаятирттал ишбажаранчитал гьуртту хъанахъисса выставкарттайгу жул продукциялухсса къулагъас мудангу ххишаласса дикIай, – буслай ур «Белсыр» СООО-лул цехрал производствалул хъунама Андрей Процко.
– Уттинин жу итабакьлай бивкIсса сепараторду 3-4 ссятрай бацIаву дакъа зузи бан бюхъайсса буссия. ЦIанакул жу итабакьлай буру 7-8 ссятрай зузигу бувну, цилва цуппа марцI буккангу бувну, зузи бан бюхъайсса сепараторду. ЖучIа итабакьлай буссар ссятрай 600 литралия 15 азарда литралийн дияннинсса накI дуккан дайсса личIи-личIисса журалул сепараторду. Ми ласлай бур накI, пиво, сокру итадакьайсса заводирттал, дикIул комбинатирттал ва мюрщисса фермертурал хозяйствардал. ЦIана Аьрасатнавун дазул кьатIатусса кьай-кьуй къаитадакьлакьисса чIумал, жучIараминнул кьадру-кьимат гьаз хъанай бур, – тIий, буслай ур ХIасан ХIасанов.
Махъсса 20-хъул шиннардил лажиндарай сепараторду итабакьайсса Аьрасатнал предприятиярттаву ца хьхьичIунсса кIану бугьлай бур МахIачкъаливсса «Сепаратор» тIисса ларкьусса акционер обществалул (ЗАО «Сепаратор»). Сепараторду байсса завод хьхьичIавагу Дагъусттаннай ца яла сий думур бивкIун бур. ХIакьинусса кьини предприятиялул хъунама ХIасан ХIасановлул каялувшиндаралу итабакьлай бур Аьрасатнаву бакъассагу, дазул кьатIувгу тIалавсса сепараторду. Вайннун аьркинсса частьру дуллай бур ЧПУ (уттизаманнул числовой управлениялущалсса станок) станокирттай. Вай бур багьлул ххирасса материаллая бувсса, вихшала дишин бучIисса ва чIярусса шиннардий бияйсса сепараторду. Ялу-ялун ххуй хъанай дур продукциялул дизайн ва качество.
ДакIнин бутанну, ларгсса шинал Дагъусттаннал ХIукуматрал председательАьбдулмуслим Аьбдулмуслимов Беларусьнал делегациялущал хьунаавкьуну, кьутIи дурну диркIшиву сепараторду тIайла буклансса. «Сепаратор» ЗАО-лул мурад бур цаймигу билаятирттащал хIала-гьурттуну зунсса.
Укун цала даву ххирасса ва ххуйну кIулсса хъунаманал каялувшиндаралу предприятиялул цIа-кьини ванияр тихуннайгу хъиннура бюхттул хьуншиврий щак бакъар.
Имара Саидова