Хъаннил байрандалул хьхьичI кьини Мариян Илиясовал цIанийсса «Дараччилул» вакилтал, хъунмур Гульшан Хасаеващал бивунни байран барча дуван Лакрал театрданувун ва Лакрал радиолул редакциялийн. Театрданул худрук Бадрижат МахIаммадхIажиева бувсса кьинигу духьувкун, ва личIину барча бунни.
Гульшан Хасаевал кIицI лавгунни Лакрал театр миллат ларайсса магьирлугърачIан кIункIу баврил ххуллий хъуннасса даву дуллай бушиву, жагьилсса, гьунар бусса артистъталгу бюхъу буну зий бушиву. Бадрижат МахIаммадхIажиевал барчаллагь увкунни мудангу театрданул чIарав бацIайсса «Дараччилул» душваврахь.
Лакрал радиолул редакциялул хъунмур редактор Тамара Закарьяевалгу барчаллагь увкунни «Дараччилухь» лакрал идарарттал оьрмулух ва даврих къулагъас мудангу дуллай бушиврухлу. Хъамаллурал кIицI лавгунни цанмагу тIааьнну бушиву лакрал культуралул кюртти, ца кулпатру кунма, зийгу, къуццу тIийгу бушиву.
«ХIакьину тюльпаннал кьини дур, вай тIутIив кунна циняв лакку душваврал дакIру парх дикIаннав, буттал кIанугу, миллатрал мазгу, культурагу тIутIайх дичиннав. Ва ххуллий лакрал идарарттал дуллалисса давугу дузрайн дукканнав.
Цуксса жунма ччайнугу, циняв лаккудушру барча бувансса сантгу дакъахьувкун, жулла барча баву лакрал радиолул микрофондалул кумаграцIух цинявгу лакку душваврал ужагъирттайн диянссар тIисса тамахIрай буру», – увкунни хъамаллурал.
Бивунни душру СВО-лул Аьрасатнал цалчинма Виричу НурмахIаммад ХIажимахIаммадовлул нину, Сапижат Мазаева каялувшиву дуллалисса МахIачкъалаллал 54-мур школалийнгу.
Сапижатлул школалий экскурсия бувну, бувсунни душваврахь кIулшивуртту дулаврил ва патриот тарбия дулаврил даву хьхьичIунсса даражалий дуван хъит тIисса коллектив бушиву.
КIицI лаганна, вара кьини маркIачIанмай Сапижат Мазаевал «Дараччилул» душваврайнгу оьвкушиву СВО-лий гьуртту хьуминнал ниттихъансса ва кулпатирттансса ифтарданийн, «Щунудагъ» тIисса банкетру бай залданувун. Шикку дунни ххуйсса дуаьрду, инсантурал дакIурдиву ххуйсса пикрирду ва паракьатшиву хIасул хьуннав, дунияллий дакьаву хьуннав, лакку душварал оьрмулул ххуллурду чаннасса хьуннав, оьрчIал дард къаккакканнав тIисса.
Вай дуаьрдацIунгу бакьлай, ххаришиврул дакъа цавагу хъамитайпалул иттату макь къадукканнав, оьрчIал оьрчIал ххари буллай, оьрмулул бучиннин битаннав тIий буру жугу.
Байрандалул хъирив кьини Гульшан Хасаева, Жанна Абуева, Динара Маммаева ва ПатIимат МахIаммадова бувкIунни «Илчи» кказитрал редакциялийн жугу барча буван, ххуйсса ссайгъатирттащал ва тIутIал кацIурдищал. Хъунама редакторнал хъиривчу Руслан Башаевлулгу хъамалудушругу, «Дараччилул» циняв душругу барча бувну, пишкаш бунни цалва луттирду.
Динара Маммаевал кIицI лавгунни, цилла нину, «Дараччи» клуб хIасул бувсса Мариян Илиясова, мудангу лакрал идарарттай зузисса душваврачIан биян, ххари буван хIарачатрай бивкIшиву.
Ва цIакь хьусса аьдатрал хIурмат буруччаврихлу Гульшан Хасаевахьгу барчаллагь тIий, чIурчIав дунни гихуннайгу вагу, ниттил дайдихьу дурсса цайми аьдатругу дуручлантIишиврий.
Лакку маз ва миллатрал культура ядаврил ххуллийсса агьамсса масъаларттугу гьаз бунни ва хьунабакьаврий.
ПатIимат Рамазанова
