Мартрал 4-нний Шяраваллил хозяйствалул министрнал цалчинма хъиривчу Шарип Шариповлул каялувшиврий хьунни АПК-лул Оператив штабрал заседание.

Ваний гьуртту хьунни муниципал районнал бакIчитал ва шяраваллил хозяйствалул управлениярттал каялувчитал. Ххал бигьлагьисса масъаларттава яла агьаммур бия интту къурнил давуртту дайдишаву. Хъузалтран дакIнин бувтунни хъуру дугьайни агротехникалул давуртту цила чIумал бартдигьлан аьркиншиву ва ххуйсса даражалул гьанна бугьан аьркиншиву. ЛичIину ххал бивгьунни бакIлахъру дуруччаврил масъала. Ихтилат бия ххяххиярттайн зарал биян буллалисса хъуцIурдищал талатаву дачин даврия. Видеосовещаниялий махъру лавхъминнал бувсунни ххяххияртту сахла даншиврул циняв къурнил давуртту цила чIумал дуван аьркиншиву.

Ихтилат хьунни мукунма импортозамещениялиягу. Бугьлан аьркинну бур жула ватандалул селекциялул гьанна ва мюнпатну ишла дуллан минерал оьргъашивуртту. Гьаннайсса, къурнил давурттаву чул бищун аьркинну бур цалами лартаннайн ва ттизаманнул технологиярттайн.
Ихтилат хьунни мукунма «Лучший обрезчик сада Дагестана – 2026» тIисса республикалул конкурсрайн хIадур шаврил хIакъиравугу. Му хьунтIий дур мартрал 7-нний Гумбетуллал райондалий.

Видеосовещаниялий вичIи дирхьунни районнаясса информациялухгу. Пишакартурал бувсунни къурнил техника хIадурну душиврул, миннунсса ччуччия ва гьанна биялну бушиврул хIакъираву.

ХIасан Аьдилов