Махъсса шиннардий мубараксса Рамазан зурун хасну Щардал школалул учительтурал дуклаки оьрчIащал цачIуну дуллай бур ихIсандалул акция «Милосердие в сердце – великий Божий дар».
Гьашинугу цинявппа дуклаки оьрчIал ва учительтурал сакин дунни захIматсса цIуцIаврил къашавайсса урчIра шинавусса МахIаммадов Саэдлул кулпатран кумагрансса ихIсандалул акция. Сакиншинначитурал ва акция хасну зума итадакьай чIумал циван дуври чирча – ваних жяматрал къулагъас даву мурадрай. Дуклаки оьрчIру, зума итадакьай чIун гъан хъанан диркIувкун, паччахIххуллийн бувккун, кумагран арцу дичинсса счет ккаккан дурсса наклейкартту лачIун дурсса щинал шушри ва чассаг бачIлай байбивхьуна нанисса машинарттайх. Акциялул исват бунни захIматсса цIуцIаврил къашавайсса оьрчIан кумаг баврил ххуллий жямат хIадурну бушиву цачIун хьун.
«Укунсса сиптардал кумаг буллалиссар, захIматсса тагьарданухьхьун биривсса купатирттан арцуйну кумаг баврин бакъасса, хъун хъанахъисса никираву цIими ва жаваблувшинна тарбия дангу. ИхIсандалул акциярдай гьуртту хъанай оьрчIан лахьхьинтIиссар цайминнал буруккинттах цIимилийну буруглан, аякьа дуллан, мюхтажманан кумаграл ка тIитIин.ЧIявусса дуклаки оьрчIан ва аьдат хьуссар школалул оьрмулул ца агьамсса бутIану, цилгу кIул буллалисса хъиншиврул кьимат цирив», – тIий бур школалул директор Мариян Ибрагьимова.
«Жун кIулли Саэдлул кулпат жула кумаграх мюхтажну бушиву, – тIий бур дуклаки душру. – Жун ччай бур ккаккан бан жува куннал чIарав кув бацIан хIадурну бушиву».
Сакиншинначитал дакI дарцIуну бур, ва журалул акциярдал кабакьу буллай бушиву оьрчIаву яла ххуйми инсаншиврул хасиятру тарбия дан ва муницIунма цайми школардайнгу оьвтIий бур акциялувух хIала буххан.
Зулайхат Тахакьаева
