Ларгсса нюжмардий Дагъусттаннал университетрал ректоратраву хьунни республикалул халкьуннал 14 мазрайсса гъалгъалул луттирал («Разговорник») презентация. Ва даврил сиптачи бур кIицI лавгсса университетрал Дагъусттаннал мазурдил профессор, филологиялул элмурдал доктор, Халкьуннал Мажлисрал депутат Узлипат ХIасанова. Автортурал коллектив луттираха зий бивкIун бур кIира шинал мутталий.
Пресс-конференция дачин дурну ия ректор Муртазааьли Рабаданов.
Ванал кIицI лавгунни, Аьрасатнаву уттинин укунсса журалул даву дурну дакъашиву.
«Жул университетрал мудангу хъуннасса къулагъасгу дуссар, кабакьавугу дуссар мазру лахьхьаврил ххуллийсса давурттах. Дуссар личIину оьрус маз ва оьрус мазгу, дагъусттаннал мазругу лахьхьин буллалисса отделенияртту, журналистикалул факультет ва кьатIаллил билаятирттал мазру лахьхьин буллалисса факультет. ЖучIа дуклай буссар сайки ттуршва миллатрал инсантал, буссар миллатирттал мазру лахьлахьисса группарду. Ми группардаву увагу ххюя студент ухьурчагума, жу ми ябантIиссар», – увкунни ректорнал.
Узлипат ХIасановал бувсунни, итабавкьусса лу анжагъ гъалгъалуву ччя-ччяни ишла бувайсса мукъурттил ва калимарттал лу бакъашивуча, жагьилтурал дянив ниттил мазру машгьур баву мурадрай хьхьичIунмай лавсъсса ша хъанай бушиву. Ниттил мазурдил аваданшиву ядансса давриву чIиви-хъунсса бутIа бишаву мурадрайсса. Ванил барчаллагь увкунни хъинну хъирив лавну ва давриха зий бивкIсса автортурахь.
Бувсунни луттирду школардайх бачIинтIишиву ва маслихIат бунни ниттил мазрал дарсру дихьлахьисса учительтуран, ххи дурсса программалул материал хIисаврай лу ишла буллан, мюнпат ласлан.
– Ниттил мазру ябаврил масъала так культуралул масъала бакъар, тарихийсса памятьрал, ляличIишиврул ва общество хьхьичIуннай хъит тIутIаврил масъалагур. Ва проектрал ниттил мазурдил хIурмат бушиву ва ми ябаврил ххуллий шаймур буллай бушиву ккаккан буллалиссар. Дагъусттаннайн чIявусса туристътал лага-букIлакIисса чIун дур, мазурдих къулагъас дуван гъира буманангу бучIи хьунтIиссар, – увкунни Дагъусттаннал Жяматийсса палаталул вакил, рутуллалмур разделданул автор Аьлисултан Аьлисултановлул.
Шиккува кIицI лаган, лакралмур разделданул автор ур ДГПУ-лул Дагъусттаннал мазурдил кафедралул доцент, Дагъусттаннал халкьуннал чичу Хизри Илиясов.
Презентациялий луттирал хIакъиравусса ва ниттил мазрал хIакьинусса тагьардания бувсунни «Зунттал хъами» журналданул хъунмур редактор Хамис Шамиловал, «Дагестанский аул» этнографиялул комплексрал-музейрал гендиректор Зумруд Сулаймановал, Ниттил мазурдил фондрал каялувчи Аьли Камаловлул ва цаймигу бусравсса инсантурал.
Луттираву кутIану бувсун бур Дагъусттанная, тIабиаьтрал ва архитектуралул кьиматрайсса гьайкаллая, машгьурсса шяраваллая ва районная.
Лу дунияллийн буккан бувансса спонсоршиву дурну дур ишбажаранчи Казбек Агъаларовлул.
Луттирал тираж 300 экземпляр бур. Узлипат ХIасановал бувсунни уттива тIалав буллайгу бухьувкун, луттирду цIуницIагу итабакьинтIишиву. Укунмасса цайми луттирдахагу зунсса пикри бушиву, цавагу миллат лях гьан къабивтуну.
ПатIимат Рамазанова
