Ва суратрайсса аьнтIикIа чIявуминнан бувчIуссар. Соцсетирдаву, лакрал группардаву ссихьу кунмасса чIивидушний якъабавцIусса, ванил лакку мазрай пасихIну ккалаккисса назмугу, ххуйсса такьвалий увкусса лакку балайгу къабювхсса акъахьунссар.

Ва Миясат Раджабовар, КIувратусса Аьбдуссамадлул ва Хьуриясса Шагьсаланнул душ. Миясатлун ххюра шин дур. Ялапар хъанай бур КIуврав. Ванил ниттил нину Аьйшат Бариева Хьурттал школалий ингилис мазрал дарсру дихьлай бур. Ва Шагьимардан Акниевлул ученицар. Душнил душ цичIанма бувкIсса чIумал Аьйшатлул мунин цила учительнал назмурду лахьхьин дай. Миясат цуппагу балай тIун ххирасса, такьва дусса душ бур. Ва гьунар музыкалуцIун бавхIусса буттал кулпатрайхчин буллусса бухьунссар. Ванил ттатта (буттал ппу) Рамазан Раджабов чIявучин лакран кIулссар. Макьаннугу руцайссар, балайгу учайссар. Музыкалул чулухунмайсса гьунар бутталгу бур. Ваналгу дачIу рищайссар, балайгу учайссар. – Цинма ххуй бивзсса балайрду Миясатлул телефондалувух вичIи дирхьуну лахьхьай. Цинмагу га цIана лахьхьай махъругу, такьвагу, – тIий, буслай бур Аьйшат.
ЧIиви аьнтIикIан чIа тIий буру цIуллушиву. Бюхттулсса сахIнардайнгу лавхъун ккакканнав!

Андриана Аьбдуллаева