ОьрчIру, жагьилтал ватан ххирану тарбия шаву мурадрай дуллалимур Лаккуй та-духьурчангу чан дакъар, царагу байран, царагу Кьини кIицI къаларгун къаличIай. Укун, лайкьсса даражалий, гьарца шинал кунна, хьунни Ватан дуруччул кьинилуцIун дархIусса шадлугъругу.

Гъумук Центральный библиотекалий хьунни «Будущее России – за вами» тIисса чувшиврул ссят. Ва хIадур дурсса библиотекарь Диана Гадаевал дуклаки оьрчIахь кутIану бувсунни билаятрал аьралуннал тарихрая. Ахирданий ххал дунни ва иширан хасну хIадур дурсса луттирдал выставка.

ШавкIуллал школалий хьунни «Доблесть Армии Российской» тIисса батIаву. Ваний гьуртту хьун бувкIсса бусравсса хъамаллуравух бия Лакрал ва Ккуллал аьралий комиссариатрал вакилтал Шималин Вагьабов ва Ажуб Юсупов. Вайннал цалва ихтилатирттаву чIурчIав дунни ватан дуручлачиминнал хIурмат жучIава мудангу хъунмасса бивкIшиврий, дуклаки оьрчIахь бувсунни аьралий тарихравасса ярг-яргсса лахIзардая.

ЧIарттал школалий шяраваллил библиотекалущал цачIуну хьунни ва кьинилун хас дурсса шадлугърал линейка. Дуклаки оьрчIал увкунни балайрду, дурккунни назмурду. Ахирданий тIутIал шалка бивхьунни Буттал кIанттул цIанийсса Хъунмасса дяъвилийн лавгминнан дацIан дурсса гьайкалдануцI.

Бадрижамал Аьлиева