Февральданул 26-нний ДР-лул Халкьуннал Мажлисрал председатель Заур Аскандаровлул каялувшиврий хьунни парламентрал 52-мур сессия.

БакIрай махъру лавхъунни цаппара фракциярттал вакилтурал. КПРФ фракциялул депутат Мурзадин Авезовлул дурккунни КПРФ фракциялул депутатътурал ПаччахIлугърал Думалийн­сса лабизаву, муний тIалав буллай бур марцIсса политикалул ххуллийсса талатаву дачин даву ххувшаврил ва дузалшиндарал цIаний.
ДР-лийсса «Справедливая Россия» фракциялул депутат Марат Алияровлул гьаз бунни Дагъусттаннай оьрчIал цIуллушиву хъин дансса бигьалагаву дузал даврил масъалартту.
«Единая Россия» фракциялул вакил Узлипат ХIасановал бувсунни СВО-лий ххувшаву гъан даншиврул Дагъустт­аннал хъаннил буллалисса захIматрая.
Заур Аскандаровлул аьла-ссалам бунни 2025 шинал октябрьданий хушрай СВО-лийн лавгун ивкIсса ДР-лул Халкьуннал Мажлисрал депутат АьлиасхIаб Шабановлухь. Яла депутатътурал цаппара зузисса законнал проектирдаву дахханашивуртту кьамул дунни.
КIилчин дурккуну кьамул дунни «Дагъусттаннай инсантал патриотшиврий тарбия баврил хIакъираву» тIисса Закондалул шамилчинсса статьялуву дахханашиву даврицIунсса закондалул проект.

Мукунна кIилчин дурккуну кьамул дунни «Хасъсса аьра­лий операциялул гьурттучитуран ва миннал кулпатирттан ялун ххи бувсса социал кумагирттал хIакъираву» тIисса ДР-лул Закондалул кIилчинмур ва шамилчинмур статьярдаву да­хханашивуртту даврицIунсса закондалул проект.
Депутатътурал кьамул ду­нни «Дагъусттан Республикалий жаваблувсса бизнес дачин даву лядуккан даврил хIакъираву» тIисса, «Дагъусттаннайсса Аьра­сатнал халкьуннал культуралул ирсирал объектирдал хIакъираву» тIисса, «Дагъус­ттан Республикалий дуккаврил хIакъираву» тIисса закондалул проектру.
Сесиялий кьамул ду­нни мукунна аьрщарал арарду цалийн дуцаврицIунсса, экологиялуцIунсса, чIиримур ва дянивмур ишбажаранчишивруцIунсса, чIявуквартирартту бусса къатраву капремонт даврицIунсса ва кIанттул цилакаялувшиврул органнал давурттацIунсса законнал проектру.