Ватан дуруччул байрандалул гьантрай ЦIуссалакрал райондалийсса Шушиннал школалул 8-мур классрал дуклаки оьрчIал чивчунни хасъсса аьралий операциялийсса аьралийтурачIан бюххансса чагъарду.
Вайннал бувсунни аьралийтурайн хъуннасса вихшала душиву, миннал чувшиву цанна эбратну хъанахъишиву ва хъунмасса умуд бушиву ми цIуллуну, сагъну, ххувшаврищал зана хьуншиврийн.
Дуклаки оьрчIал барчаллагь увкунни цала паракьатшиврул цIаний цIарал хьхьичI бавцIусса къучагътурахь. ДакI дачIлай, кIибавчIунни миннащал цала хияллу ва умудру.
Укунсса оьрчIаясса чагъардал аьралийтурал дакI тирх учин даврицIун, кьини дуркний цинявннал цачIушиву, цашиву исват дуллалиссар.
23-мур февральданул байрандалул ттизаманнул Аьрасатнаву, хасъсса аьралий операция байбивхьуну махъ, хъиннура куртIсса мяъна хьунни. Ва хъанай дур Ватан дуручлачиминнансса Барчаллагьрал кьинину, чувшиврул ва ватан ххирашиврул лишанну.
Андриана Аьбдуллаева
