НурмахIаммадлул аьпалун

ЗахIмат кьини дучIайсса,
Вирттаврал бакIрачIанни,
Вирттал хъинми кIул шайсса
Мукунсса кьинирдайри.

Дурксса кьинирду лахъан
Гьарцаннаща къашайссар,
Инарив ми лархъунни,
Жандалий хIайп къавкуну.

Агь, ттуруллал бувгьу баргъ,
Нязаннив кьаркьсса тIутIий,
ХIайп бакъаяв вил чурххай
БивкIулул мугьру бищун.

Лакрал ттуруллал ттурший,
ЛивчIуннахха цIаннаву,
Жул кьиблалул дагьаний,
Ивхьссарав аьрщараву?

Чансса вирттал къабувкссар
Лакрал мюрщи щархъава,
НурмахIаммад, вил цIанил,
Ми циняв бюхттул бунни.

Баргъ ттуруллул бувгьнавав,
ЧIутIул чявхъа бивчнавав?
Душмантурайн лажинну
Ина жан дуллалийни.

Пирдавc-алжан булуннав,
РухI бигьаний дишиннав,
Винма къабуллу оьрму
Булуннав ххира душнин.

Вилмургу гьанссар оьрму.
Аьрщаращал дакI дачIлай,
Ниттилгу гьанссар оьрму.
Вил бивкIулул дард ккухIлай.

Бивхьуну бухьурчагу
Чурх лухIи аьрщаравух,
НурмахIаммад, вил симан
Чаннану жущал дуссар.

Ккуллал Мурадлул аьпалун

Вирттал бувкссар Ккулату,
Ватандалийх цIа дурксса,
Мурад, вил гьунарданул
Ми циняв абад бунни.

Уссар чинсса чув усса
Вил буттал шяравалу,
Гъав лаган дуруннихха
Вил бявкъу хаварданул.

ЯхI гъавгъун ливчIуннихха
Вила нартсса уссурвал,
Зума тIутIи буннихха
Ххира нину ва гьапу.

Мурачухъал Халидгу,
Чаннановхъал МахIмудгу,
Амучихъал Заургу –
Ккуллал чувтурал дастта.

Жаннайгу хIайп къакуну,
Аьрасат бурувччусса,
Агьалинал дакIурдив
Абадлий личIантIисса.

Шяраву хIурмат бусса
Аьликьадийхъал тухум,
Вил бивкIу дакIнийнува
Оьрмулухун личIувча.

Дунияллул хаварду
РухIиран баяйхьурча,
Хъунбуттал Ирбагьиннул
РухIгу инжит хьухьунссар.

Вил рухI хъинний дишиннав,
Пирдавс-алжан булуннав,
Винма къабуллу оьрму
Уссурвавран булуннав.

Инагу кьянкьа дува
Аьрщаращал дакI дачIлай,
Ниттилгу яхI буванссар
Аьрщи лаллай – дакI лаллай.

Къаккакканнав тачIавгу
Нитти-буттан лякьлул дард,
Къагьаннав ахиратравн
Мурадирайн къаивма.

Дибирдул аьпалун

Та ЦIувкIуллал хIатталлив
КIия дус, кIия къучагъ,
КIиннанмагу ца кьадар –
Чувшиврий жан дуллусса.

Ниттихъан ца лякьлул дард
Арсру ливтIуну ккарксса,
Жяматран ца хажалат –
ЧиваркI чан хьуну ливчIсса.

Дибир, хIакьсса зунтталчу,
Яллагь, вил аьпа баннав,
Винма къабуллу оьрму
Булуннав вил душвавран.

Ца-цанналгу кьариртсса
Зири-завал дуниял,
Кьариртунни инагу,
МахIрум бувну махъмигу.

Подполковникнал лишан
ЛухIи гьаттав аьянссар,
Гьаттал ялув ххяхханссар
ОьрчIаяр ххуйсса тIутIив.

ТIаннул ЦIувкIрав цIадурксса
Та Дивиравхъал тухум,
БикIувча яхI буллайнма,
Вил бивкIу дакIнийнува.

Бархъаллал Мурадлул аьпалун

Ина жан дуллунни Буттал кIанттухлу,
ХIайран бувну циняв ссурхIи ва лакгу,
МахIрумну ливчIунни вил ппу ва нину,
КкухIлайнма ливчIунни вил бивкIулул дард.

ЧIявусса ливчуссар та Бархъарату,
Улча бюхттул бувсса арсру ва душру.
Миннал цIа хъиннура ина гьаз дунни,
Вила жандалийгу хIайп къаувкуну.

Вил оьрмулун талихI буллун буния,
Кулпат личIанссия чувнал щащарну.
Ххув Заннал наслулун хIикмат бувния,
Арс, душ личIанссия вил цIа къадирчIан.

Чансса бакъар ливчIун ва лакрал улклуй
Лякьлул дардру духIлай нитти-буттахъул.
ДухIанссар вил дардгу вил нитти-буттал,
Цуксса захIматнугу лялиян дуван.

СантIухъал МахIаммадлуха

Тамансса ливчуссар кIа Хъун ЦIувкIрату,
Ватан дурурччусса къучагъсса вирттал.
Султанхъал АхIмадхан – чаннаннил барзу,
Душмантал къир бувсса ссавнил пагьламан.

Ттул ххуйсса дусталъя вил хъунбуттахъул:
СантIухъал МахIаммад, Аьдилхъал Сяид.
КьурчIи хавар бавну, къума лавгунна,
Я уччин ссукIурайн нясив къавхьунна.

Малаиктураву яхIчи МахIаммад,
Аьрщараву дачIлай миннащал дакIгу.
Сяид хъунбутталгу кьянкьа дуванссар,
Алжаннаву вищал хьунаакьиннин.

ЯхI бача къучагънал ниттил ва буттал,
Ялунмай хъяйнугу, вивппай хъяхъа тIий.
Хъун хьувча аьтIий-хъяй вил ххира душгу,
Щалиххан къавхьусса аьзиз буттая.

Паммалул шануну хьунадакьиннав,
Вил авкьатсса чурххал лув лухIи аьрщи.
Алжаннул къапуну тIитIлай личIаннав
ХIавтI лакьин дирхьусса чарил нузкьунттив.

СунбатIуллал Нуруллагьлуха

ЧIирисса шярава жул СунбатIлия,
Шамийлчинсса чуври зана къавхьусса.
Хъунама уссугу талайри тийха,
Аьрасат буручлай душмантурая.

Ласунссар хьхьем бургъил, цуксса ганзнугу,
Лаянссар аьрщигу, лаянссар дакIгу,
Къучагътурал бавай, яхI ба, Наташай,
ЧIявусса ниттихъул мукунни бусса.

Хьулгу маличIара ххира арсная,
Зана хьунссар тIисса умудрай бикIу.
Авлул гадагума, алши бухьурча,
Зунчалату бувккун барзунттайн лахъай.

БакIрачIан ци бувкIри, аьзиз Нуруллагь?
Аски душманначIа ясирну урав?
Ягу кьурукьирайн кIурагу лавгун,
Гьава буллай урав, илкинсса ссавнийх?

Вих луглай ухьунссар бутта Оьмаргу,
Алжаннавун лавгсса шиннардил хьхьичIва.
Цибанссар, чичрулун банмур бакъассар,
Ххув Заннал чирчусса цинявннан хасну.

Чув ина унугу, уний цIуллу хьу,
Та зана хьурчагу, шавай зана хьу.
Нажагь зана хьуну, лув къалякъирча,
КIулша, ниттил ччаву лирчIссар аьрщарай!

Бадавинал аьпалун

Ва гъидайдихьулул гъилисса зуруй,
ПпабакIул чулуха хIукъу бувккунни.
ХIукъулущал бия бявкъусса хавар,
Уссар чин чув усса Ккуллал шяравун.

Кьуния кIира шин оьрмулул хьуннин,
Ина жан дуллунни Аьрасатнахлу.
Аьрасатнал кьини лухIи ларххунни
Ххирасса ниттил ва аьзизсса ссувал.

Заманагу гьанссар, чIунгу дучIанссар,
АьтIийнна ниттилгу оьрму гьанбанссар.
Хъамакъаританссар вин мина-гьану,
Ватан ядуван яхI виву бивхьусса.

Агана бивкIхьурча вил дакIний ччисса,
ЯхI банссар мунилгу ина дакIнийну.
Ласайхха хьхьем бургъил, цуксса ганзнугу,
Лаяйссар аьрщигу, лаянссар дакIгу.
МахIмуд Аьлилов,
ш. СунбатIул
Виричунал ниттихь Сапижатлухь

На кьалан бувгьукун вийн сcалам чичин,
Цукун бура цIуххин, чIалну бунугу,
Вийн бивсса хъун бала чIалан бивкIукун,
Лакку мазрай махъру ттун къалявкъуна.

Щала дунъяллунгу аьчухну баллай,
Жула билаятрал бакIчи Путиннул
Пахрулий увкукун: «На лаккучура»,
Мунияр лахъсса махъ ттун къалявкъуна.

Цукун бура ина, вирттаврал нинуй,
«Че Гевара» арсгу чIарав акъаний?
Цал ттигу лакрал цIа инар гьаз дурсса,
Вил «ниттил накIлилли» Виричу увсса.

Ниттихъул, кулпатру лухIулувусса,
Зухасса дуаьрду ссавруннайн дирссар.
Шайссания жуща зу рахIат буван,
Жула арсру булун зулминнан кIанттай.

Багъишлагу бити, ялттугу бучIу:
Жул ссалам чIалнугу, жу вищалссару.
Сапижат, вил хIасрат жулгу хIасратри,
ЦIуссалакрал жямат икрамрай буссар.
Зайнуллагь Мирзоев,
ш. ТтурчIи
КIяла бакIрал заллу, хъунав къавхьусса

Даниял Магьдиевлул аьпалун

МяйцIалла хьуннича, щяикIу чирчан,
Ина ци чинавав, ци къачинавав?
Шяраваллил жямат, дуклаки оьрчIру,
Даврил уртакьтал ва чIахху-чIарахми,
Цан гъалгъатIи бував ларгсса чIумуя?
Чаннасса яруннил нур рутIайссияв:
Лахъива-лахъисса, лахъи-уттасса
Майдан ккурчIа бурхха вихва ялугьлай.
Дахьа игьалаган вин лайкьсса чIумал
Ина бувсса музей бур вих ялугьлай.
Школа бур гъаривну, аргъ чансса кунма,
Цуппагу хьуссарав ятин тIий, цIухлай.
Ина ша къабизлай ХъачIра-Ххуллу бур
Хъяхъа куну лавгун, лиян хIадурну.
Щюлли къуратугу нур ларсун дурхха,
Щюлли уртту-тIутIахь щурщу байссияв?
Щарнил цумур кIанттайн цу уккарчангу,
Цума-ца ци дуллай айиширчангу,
ЦIакьсса хIукму щащан, маслихIат буван,
ЦичIав чин Даниял акъархха учай.
ХIукуматран пикри чантI учиннинва
Инава сакин був «бивкIу бакъа полк»
Байрандалул кьини вих луглай бури,
Вингу бакъашиву бивкIу бусан ччай.
Хъуниминнан ияв арс куна чIалай,
Мюрщиминнан ияв ппу куна чIалай,
УвкIманан гъилисса къаттагу бия,
ПаччахI щяитансса тах вичIа бия,
Гьарцаннансса кIану дакIниву бия,
Оьнугу, хъиннугу ци иш хьурчагу,
Аьркин хъанай ина шяраву ияв.
Ина акъарча тIий, вихрасса ччаву,
Хъунна хьурча дакъа, чIири къархьунни.

Аьзизсса кулпатрал Анисатлул цIания

Ай, икIан акъаяв ина дунъяллий,
Ай, итан акъаяв мяйцIалла хьунцIа,
МяйцIалла там шайсса кьини дуркIувкун,
Марххала бунугу, замгьар бунугу,
Ца инсаннайн ина къаоьвчирчагу,
Вил дакIнил макьнатIис ччинийн дияйва –
ВичIан дачинссия дустурал кьюкьа.
Къаучинна на вихь, вищалва архIал
Алжаннавун бачу цан къачав куну.
Амма оьрмулува ина лагайхту,
Ттунгу дунияллух гъира левщунни.
Ганиннинна диркIсса ххаришивуртту
Дакъари утти ттул дакI тирх чин дуллай.
Дарвазалул нузру вийнна оьвтIий дур,
Къатлул мукьра лажин вих ялугьлай дур,
Ахъувусса мурхьру ина цIухлай бур…
Ханича Аьлиева,
ш. Ккурккул