Дунияллул халкьуннал дянивсса Ниттил мазрал кьинилун хасну дуллалисса мероприятиярттал лагрулий, Ккурккуллал школалий хьунни фронтовик, цIанихсса аьлимчу, журналист МахIаммад Буттаевлун хас дурсса вечер. Зал чIюлу бувну бия МахIаммад Буттаевлул архивравасса суратирттал, тIиртIуну дия ванал луттирдал выставка. МахIаммад Жалалуттиновичлул оьрмулия, дяъвилул ххуллурдая, элмийсса лайкьшивурттая бусласисса ихтилат бунни оьрус мазрал ва лакку мазрал дарсирдал учительница Гульнара Магьдиевал.

– МахIаммад Буттаевлул бивтун бур саллатIная айивхьуну цIанихсса аьлимчу, машгьурсса чичу ва журналистнайн ияннинсса яргсса оьрмулул ххуллу. Ларгсса шинал ахирданий республикалий кIицI ларгунни ванал 100 шинал юбилей. ­Оьрмулул 17 шинаву хушрай дяъвилийн лавгун, цIаран лавхъсса дяъвилул ххуллурдай, цимилагу оьрмулул ва бивкIулул ххуттайсса тагьарданий ивкIун ур МахIаммад. Цала фронтрайсса чичрурдаву ванал ккаккан дурну дур дусса куццуйсса дяъвилул лажин. Дяъвилия зана хьуну махъ зий ивкIун ур хIукуматрал жаваблувсса къуллугъирттай. Ва ивкIссар «Советский Дагестан» журналданул хъунама редакторну, Дагъусттаннал Журналистътурал союзрал хъунаману. 1980-ку шинал М.Ломоносовлул цIанийсса Москавуллал университетраву лайкьну дурурччуну дур элмурдал доктор ­хьунсса ­диссертация. Ванал ­«Ккурккуллал хъярчру» таржума бувну бур чил билаятирттал мазурдийнгу. МахIаммад лайкь хьуну ур личIи-личIисса наградарттан. Миннувух дур Буттал кIанттул цIанийсса Хъунмасса дяъвилул 1-мур ва 2-мур даражалул орденну, – бувсунни учительнал.

Экрандалия ккаккан бунни личIи-личIисса шиннардий МахIаммад Буттаевлул Дагъусттаннал телевидениялул журналистътурахьхьун дуллусса интервьюрдавасса бутIри.
Дуклаки оьрчIал бувккунни ванал дакIнин бичавурттавасса парчри, ккаккан бунни «Ккурккуллал хъярчру» луттиравасса инсценировкартту.
Мероприятие хIадур дурну дия Гульнара Магьдиевал, ЦТКНР-нул методист Аймисай Аьбдуллаевагу гьурттуну.

Андриана Аьбдуллаева