Февральданул 23-нний Ккуллал райондалул Культуралул къатлуву хьунни Ватан дуруччул байрандалун ва Аьрасатнал Халкьуннал цашиврул шинан хас дурсса шадлугърал мероприятие.
Шадлугърал мажлис тIитIлай, ихтилат бунни Ккуллал райондалул бакIчинал бигарду чIумуйну биттур буллалисса Ажуб ХIусмановлул.
– ХIакьину жува кIицI лаглай буру Ватан дуруччул байрандалул кьинигу, Аьрасатнал Халкьуннал цашиврул шин дайдишавугу. Халкьуннал цашиврул байран – му хъанай дур миллатирттал дянивсса дусшиврул, куннал кув бугьаврил барашинна. Дагъусттаннал аьрщарай ялапар хъанай бур республика хьхьичIуннай давриву хъунмасса бутIа бивхьусса цикссагу миллатру. Байрандалул дур тарихийсса мяъна, Аьрасатнал билаятрал гуж ва сий цIакь шаврил цIаний халкь цачIун буллалисса. Аьрасатлувтурал хъунмур мурадну хьун аьркинссар ва цашиву никирая никирайн дуруччаву.
Аьрасатнал президент Владимир Путиннул мудангу кIицI лагай билаятрай ялапар хъанахъисса цинявппагу миллатирттал мазру, культура, тарих ва аьдат-эбадатру цIакьну ядан ва дуруччин аьркиншиву. Укунсса журалул хьунабакьавурттай цIакь хъанай ва итххяхлай бур ялун нанисса никирал граждан позицияртту, – увкунни ванал.
Мукунма кIицI лавгунни февральданул 23-мур кьини ккалли хъанай душиву аьралуннал чувшиврул ва кьуватрал лишанну. Барчаллагь увкунни хIакьину Ватандалул мюхчаншиву дуручлачиминнахь.
Ваччиял школалул дуклаки оьрчIал дурккунни миллатирттал цашиврун хас дурсса назмурду. Магьирлугърал къатлул зузалтрал увкунни дусшиврухасса балайрду.
Имара Саидова
